Владимир Волков васетькшнесь «Мордовия» ФК-ть представителензон мархта

Владимир Волков васетькшнесь «Мордовия» ФК-ть представителензон мархта

Шуваланяста, 12 июльста, Республикань Кудса Мордовиянь Оцюнясь Владимир Волков васетькшнесь «Мордовия» футбольнай клубть представителензон и синь тренерснон мархта. Васедемась етась 2018-2019 сезононь ФНЛ-ть карша, кона ушеды тяддень 17 июльста.

Мордовиянь Оцюнясь поздравляндазе командать од сезонть ушедоманц мархта и арьсесь спортсметтненди сатфкст. Сон азсь надияма футбольнай Премьер-лигаса минь налхкиеньконь сяськомаснонды.

«Региононь руководствась фалу кирнезе клубть ширенц и тяфта кармай тиендевома сяда товга. Од сезонть минь ушеткшнесаськ, сяськомок тяда инголе эвондаф финансовай прябалатнень. Тифт цебярь условият анокламанкса, тяконь лувксса тренировочнай площадкат. Минь мольфттяма корхтама республикань оцю промышленнай предприятиятнень мархта «Мордовия» ФК-ть судьбаса синь участвондамаснон колга», - азозе Владимир Волков. – Тинь одкстоптовсь составонте. Теенть эряви арамс марстонь, кеме и вии командакс. Налхкихненди путомат вийхть сянкса, штоба кемокстамс эсь вастонтень. Эряви лама тренировандамс, тонафнемс, оттненди касфтома профессионализмасна».

Мордовиянь Оцюнясь отмечазе, што футболть коряс Миронь чемпионатсь лездсь тиемс оцю аськолкс спортонь тя видть виияфнемаса, тяконь лувксса и идень футболть. Ламода кассь странань, тяконь лувксса и Саранскяень эряйхнень интерессна футболти. Клубоньконь васенце налхкомазонза, кона етай «Мордовия Арена» стадионца учендови 28 тежянь болельщик.

«Эряви сявондемс мяльс, што ломаттне тонадсть ваномс цебярь матчт, и теенть эряви путомс пяк лама вий, штоба аф юмафтомс аудиториять. Эздодонтт ащи сайхть-аф болельщикне сяда товолдонь налхкоматненди. Стадиону должетт сашендомс аф 15-20 тежяньда лама болельщик, Мзярда-бди ломатть семьянек сашендсть футбольнай матчнень ванома, эрьда эреклафтсаськ тя койть», - поладозе В.Д.Волков.

Мордовиянь Оцюнять валонзон коряс, футболть коряс Миронь чемпионатсь казсь Россияти наследиянь пяк лама объект, а омба масторонь болельщикненди ульсь кода няемс, кодама лац синь тяса примсесазь. Няезь, кодама паронь арьси ломатть эряйхть минь странасонк. Тяда башка, странань

и омба масторонь эряйхне, конат ульсть Мордовияса, макссть оцю оценка Саранскяйса мундиальть етафтоманцты.