Инновационнай касомань-вииякшнемань эрь кизонь рейтингса, конань аноклакшнесазь Экономикань высшай школань эксперттне, Мордовиясь сувась кемонь инь цебярь территориятнень лувксс, занямок кафксоце вастть.Оценкань максомста сявондевсь мяльс региоттнень инновационнай климатсна, научно-техническяй потенциалсна, инновационнай политикаснон качествац. Васенце вастть занязе Татарстанць, мельганза молихть Москусь и Санкт-Петербургсь. Кемонь инь цебярь региоттнень лувксс стане жа сувасть Нижегородскяй областсь, Башкортостанць, Калужскяй областсь, Чувашиясь, Томскяй областсь и Красноярскяй крайсь.
«Индекс инновационной деятельности» показательть коряс республикась тага азф лидеркс Россияса. Кода отмечазь исследованиянь авторхне, тянди васендакиге лездсь инновационнай деятельностть оцю результатонь сатнемац. Тяфта, инновационнай продукциять пяльксоц марстонь объемса пачкодсь 28,3 процентс, мезсь колмон-крда сяда лама средняйста странаса показательхнень коряс.
Мордовия Республикась шарфты эсь лангозонза мяль нолневи продукциять одксшинц мархта: нолневи товархнень еткста одонь категорияти канневихть синь 7,2 процентсна (сравнениянди – средняйста Россияса тя показательсь аф 1 процентта лама).
«Республикать сяда товолдонь касоманц-вииякшнеманц ули кода обеспечендамс аньцек одкстопнемок экономикань сембе основной отраслятнень. Инновационнай производствать тевс сувафнемац сяда товга кармай улема тейнек васенце вастса, - азозе Мордовиянь Оцюнять аф оцю пингс тевонзон тиендисна Владимир Волков.