Ледстясынек, шукштнэнь тевс нолдамонь коряс реформась официальна ушодовсь минек масторсонть 2019 иестэ. 2030 иентень ашти тев: явшемс 100% шукштнэнь ды пачтямс переработкас – 50%.
Вице-премьерэсь Виктория Абрамченко тешкстызе, «РЭО» ППК-сь видестэ ладизе ТКО-тнень тевс нолдамонь лувонть. «Реформанть ды национальной тевтнень, конатнень тешкстынзе Президентэсь, вадрясто топавтоманть туртов, васняяк, эряви теемс шукштнэнь обработкань ды утилизациянь коряс неень шкань инфраструктура», – мерсь сон.
Кода тешкстызе РФ-нь пертьпельксэнь ресурстнэнь ды экологиянь министрась Александр Козлов, ТКО-нь весемеендо тевс нолдамось – минек масторонь весе экологиянть туртов прявт пелькс. Вете иетнень перть отраслянть туртов примазь малав 60 законт ды нормативно-правовой актт, конатне путозь те реформанть юрс.
Вете иетнень перть «Российский экологический оператор» ППК-нь важодемань невтевкстнэде евтнесь компаниянь генеральной прявтось Денис Буцаев.
Мордовиянь Прявтось евтнесь региононь опыттэнть ды Россиянь экологической операторонть лезксэнзэ пингстэ республикасонть инфраструктурань проекттнэнь топавтомань арсематнеде. «Минь саинек эсенек лангс тевть иенть прядовомс строямс шукшонь явшемань инновациянь комплекс», – тешкстызе Артём Здунов. Сонзэ виензэ кармить 180 тежат тоннат иезэнзэ. Эште вейке тевесь – строямс од полигон».
Ледстясынек, Мордовиясь кармась васенце регионтнэнь ютксто вейкекс, конат ушодызь шукштнэнь тевс нолдамонь коряс од системанть эрямос совавтоманть. Республикасонть вадря региононь оператор, кода тешкстызе Артём Здунов. Целанек одкстомтозь контейнерэнь паркось, Мордовиянь школатнесэ ютавтовить экологиянь содамочитнень коряс урокт, тевс нолдави шукштнэнь башка-башка пурнамонь лувось.
Республикань Прявтось евтась сюкпря Виктория Абрамченконень, Россиянь Минприродань ды Россиянь экологиянь операторонь руководствантень ТКО-нь тевс нолдамонь коряс регионтень лездамонть кисэ ды евтась кемема седе тов лезэв вейсэнь тевдееманть коряс.
Мордовиянь Прявтонть марто вейсэ мероприятиясонть ульнесь вице-премьерэсь Инсаф Хайруллин.
Мордовия Республикань Прявтонь Пресс-службась