Тешкстазель, кенярксчинть лувсо ютавтовить ламо мероприятият. Прявттнэстэ вейкесь ютавтови чадыковонь 18-це чистэ «Россия» раськеютконь выставкасонть-форумсонть – те деловой вастовомат, концертт, мастер-класст, выставкат, конат вейсэндязь «Мордовские языки в информационном пространстве» вейсэнь тематикасонть.
Вастовомантень пурнавозетненень пшкадемстэ, Артём Здунов мерсь: «Евтан тенк покш сюкпря сень кисэ: тынь важодтядо сехте питнеенть коряс, мезе минек ули – минек кельтнень, минек культуранть, минек эйкакштнень. Минек туртов, нама, питней: Мордовиянть ули эсензэ алкуксонь кенярксчизэ!»
Республикань Прявтось тешкстызе: талновты се: ней раськень енксонть ламот «налксевтить» Россиянть каршо – кемекставить раськень радикальной организацият, конат бажить путомс тешкс од ломантнень лангс. «Минек тевесь – а нолдамс сынст!» – тешкстызе региононь руководителесь.
Раськень енкстнэнь коряс важодемась ветяви эрязасто – теезь раськень-культурань куншкакурот регионтнэсэ, ладязь вейсэнь тевдеема эрзянь-мокшонь землячестванть марто, топавтовить вейсэнь проектт зярыя регионтнэнь марто федеральной грантонь лезксэнть лувсо. Эрзянь ды мокшонь раськень регионъютконь общественной организациянь ушодксонть коряс анокстазь ды кемекстазь «Сохранение и развитие национальной культуры, государственных языков Республики Мордовия» государственной программась. Тиринь кельтнень ванстомасо покш талика саи образованиянь системась – тонавтнемась ветяви республикань весе школатнесэ.
Эрзянь ды мокшонь кельтнень содавиксэкс теемань коряс общественной организациянь проекттнэде евтнесь Эрзянь ды мокшонь раськень регионъютконь общественной организациянь председателесь Юрий Мишанин. Те зярыя прявт мероприятият, истят кода - «Шумбрат» кенярксчись, «Поющее дерево» фестивалесь, «Мы вместе» эрзянь-мокшонь од ломантнень регионъютконь форумось ды лият. Те енксонть коряс важодемантень вейсэндязь аволь ансяк школатне, истя жо вузтнэ, СМИ-тне, театратне. Текень марто те енкссонть улить талновтыця кевкстемат – кадратнень а сатомась, седе пек тень редить раськень СМИ-тне, истя жо раськень кельтнень содамось ды профессиональной енкссо сынст тевс нолдамось.
Ожоковсто Саранскойсэ ютавтови Эрзянь ды мокшонь раськень регионъютконь общественной организациянь кавксоце инекужось. Сонзэ темась – неень шкань лувтнесэ эрзянь ды мокшонь раськень вейсэндявомась, эрзянь ды мокшонь семиянь койтне-кирдатне. Учовить малав 500 делегатт масторонь малав пелест регионтнэстэ. Юрий Мишанин пшкадсь республикань Прявтонтень энялдома марто – арамс инекужонтень анокстамонь коряс оргкомитетэнь ветицякс. Мордовиянь Прявтось кирдизе арсеманть ды тешкстызе, инекужось – те раськетнень вейсэндявомань вадря невтевкс.
Вастовоманть лувсо Н.П. Огарев лемсэ МГУ-нь филологиянь факультетэнь деканось Иван Рябов евтнесь эрзянь ды мокшонь кельтнень ютавтомань коряс сервисэнть теемадонзо – госпрограмманть лувсо тень лангс явозь грантонь ярмакт. Уш ней варчамонь лувсо важоди чат-бот Телеграмсо, конась ютавты искусственной интеллектэнть вельде.
«Важодемась покш: чат-ботось, кода эйкакш, конань эряви тонавтомс келентень. Те кинть ушодома – зярс топавтозь весе важодематнень эйстэ ансяк 10%», – тешкстызе Иван Рябов.
«Мордовия» ГТРК-нь, «Эрзянь правда» ды «Мокшень правда» раськень редакциятнень представительтне евтнесть информациянь пространствасонть эрзянь ды мокшонь кельтнень тевс нолдамодост, ваныцятнень ды ловныцятнень марто важодемадонть. Тешкстазель, печатень валонь виесь, кадык седе сеедьстэ электронноенть, – те шкас пек покш обществасонть.
Артём Алексеевич кирдизе «Эрзянь правда» газетань прявт редакторонть Марина Девятовань ушодксонть, конась сюлмавозь раськень СМИ-тнень сотрудниктнень улемаст марто «Тюштянь налксемат» раськень налксематнень ютавтоманть марто. Тешкстазь проекттнэнь ютксо истя жо - «Словарь ранней письменности Мордовии» ды «Иероглифы Мордовии».
Мордовия Республикань Прявтонь пресс-службась