Россиянь Правительствань Председателень полавтыцясь Дмитрий Чернышенко ютавтсь важодемань вастовома Мордовия Республикань Прявтонть Артём Здуновонь марто. Сынь кортасть региононь социально-экономической виевгавтомань проекттнэде.
Истя, невтезель Мордовиянь туристэнь потенциалось. Вице-премьерэсь тешкстызе, отраслянтень мереви кармамс экономикань виевгавтомань енкстнэстэ вейкекс.
"Мордовиясо улить лиятнень енов а молиця таркат, конатнень арсеви совавтомс "Арзамас-Дивеево-Саров" туристэнь-паломникень кластерэнтень, секс мекс Саранск-Темников-Санаксарь - иневанькс таркатнень цела рисьмень а явовиця пелькс. Теде башка, тесэ улить культурань лия енов а молиця объектт, конат вечкевить минек туристтнэнень. Туристэнь потенциалось тесэ пек покш. Мордовиясь васенце республикатнестэ вейкесь, конась тешкстась вейсладямо «Туризм.РФ» корпорациянть марто. Те лезды нолдамс тевс «Туризм и индустрия гостеприимства» нацпроектэнь эрьва кодат инструменттнэнь. Тень вельде седе ламо минек эрицятненень теевить вадря условият культурань, пертьпельксэнь неть таркатнес понгоманть ды се сюпавчинь нееманть туртов, конась тесэ ули", - яволявтсь Дмитрий Чернышенко.
Кода евтнесь Артём Здунов, регионсонть ушодовсь «Саранск - Темников – Санаксарь» кластерэнь тееманть коряс проектэнь топавтомась. Те маршрутось карми алтазь Ушаков содавикс адмиралонтень. Сон карми «Арзамас-Дивеево-Саров» Нижегородской паломникень-туристэнь кластерэнь пельксэкс.
"Те республикасонть касомань-кепетемань прявт тарка, - тешкстызе Артём Здунов. - Проектэнть лувсо арсеви витнемс Санаксаронь монастыренть, косо ванстови ты адмиралонть мощанзо, теемс сонзэ лемсэ культурань-тонавтомань комплекс, истя жо витнемс ды вадрялгавтомс Темников ошонть".
"Кластерэнь виевгавтоманть лувсо арсеви теемс эли витнемс туристэнь инфраструктурань 35 объектт. Арсетяно, тень вельде кластерэнтень сыця туристтнэ ламолгадыть иезэнзэ 50 тежат ломаньстэ саезь 250 тежатнень видьс", - тешкстызе Дмитрий Чернышенко.
«Туризм и индустрия гостеприимства» нацпроектэнть лувсо вице-премьерэнть пингстэ Республикань Кудосонть тешкстазь туристэнь инфраструктуранть виевгавтомадо вейсладямо Мордовия Республиканть ды «Туризм.РФ» Корпорациянть ютксо. Документэнть алов кедьчелькест путызь Корпорациянь генеральной прявтось Сергей Суханов ды Мордовия Республикань Прявтось Артём Здунов.
"Туристнэнь пурнавомань таркатнесэ минь ванносынек номерэнь фондонь вадрячинть ды ламочинть, кемекстасынек, косо эряви строямс туристэнь неень шкань объектт. Туристтнэ ламолгадыть, тень коряс арасть кавтолдомат: религиянь туризмань лия енов а молиця объектт, финнэнь-угрань койть-кирдат ды Мордовиясо виевгадыця промышленной туризмась муйсызь эсест туристэст, - евтнесь Сергей Суханов. - Истя, Темниковань енкссо тееви паломикень кластер, конась сюлмавозь минек ине полководецэнть, адмиралонть Ф.Ф.Ушаковонь марто. Мордовиясо улить мазый пертьпельксэнь таркаткак".
"Туризмань енкссонть минек покш резерванок касоманть туртов, - тешкстызе Артём Здунов. - Ней минь карминек «Туризм.РФ» Корпорациянть марто партнерокс, - те покш эскелькс икелев".
Мордовия Республикань Прявтонь пресс-службась