Ледстясынек, шукшонь явшемань комплексэсь – шукштнэнь обработкань коряс покш технологичной объект, конась лезды киртямс ТКО-нь покшолматнень, конат пачтявить полигонтнэс.
Икелепелень явшемань кабинатнесэ кармить кочкамо истят шукшт, кода картононь паргот, полиэтилен, сулика ды эрьва кодат покш шукшт. Кшни марто шукштнэнь явшемась карми молеме автоматической лувсо. Проектэнть лувсо арсеви путомс оборудования покш шукштнэнь, истя жо чувтонь, яжамонть-вишкалгавтоманть туртов.
Тешкстасынек, объектсэнть обработкас пачтяви республикань весе ТКО-нь 75%. Седе тов утилизацияс пачтяви ТКО-нь малав 43% – се, мезенть мереви нолдамс тевс товартнэнь производствасо ды альтернативной уштомапеленть туртов.
Тесэ арсеви теемс региононь цементэнь промышленностенть туртов альтернативной уштомапелень тееманть коряс участка. Сы шкасто ули теезь ТКО-нь органической фракциятнень компостированиянь линия ды шукштнэнь ванстомань полигон.
Подрядчикень представителесь тешкстызе, объектэнь анокчись ней 32%. Тесэ важодить техникань 25 единицат ды малав 160 ломанть. Производственной прявт корпуссонть валовить киякст, уш маласо шкастонть мереви ве шкасто ветямс отделкань тевтнень ды путомс оборудования.
Артём Здунов тешкстызе строямонь кемекстазь шканть ванстомань эрявиксчинть: «Минь саинек эсенек лангс тевть федеральной центранть икеле, секскак эряви ваномс, илязо уле кадовома. Объектэсь эряви республиканть туртов, минь явовтынек 1,2 млрд целковойть федеральной ярмакт альтернативной уштомапелень производствань коряс линиянть марто шукштнэнь обработкань коряс комплексэнть строямс. Те лезды нолдамс обработкас 180 тежат тоннатнэде аволь седе аламо коммунальной калгодо шукшт иезэнзэ, истя жо теемс 57 тежат тоннатнэде седе ламо альтернативной уштомапель».
Мордовия Республикань Прявтонь Пресс-службась