Мордовиянь Прявтонть тевтнень топавтыцясь Артём Здунов ёвтась седейризкст Казанень школасо лисезь зыянсонть маштовозетнень малавиксэст туртов. Татарстан Республикань президентэнть лемс телеграммасонть кортави:
«Мельвановикс Рустам Нургалиевич!
Мордовиянь эрицятне Тынк марто вейсэ кирдить домка ризкс Казань ошонь школасо ломантнень маштомаст кувалма. Те минек вейсэнь стака сэредькс, сэпей, а онкставиця емавкс. Евтатанок седейризкст маштовозетнень малавиксэст туртов».