Артём Здунов тешкстызе, Мордовиянтень явови покш лезкс федеральной центранть – Россиянь Президентэнть Владимир Путинэнь ды масторонь Правительстванть пельде. Те лезды республикантень топавтомс инфраструктурань ды социальной прявт проектт, конат вадрялгавтыть ломантнень эрямост, эрязасто ветямс важодеманть национальной весе проекттнэнь лувсо.
Эфирсэнть, нама, максовсть башка кевкстемат республикань эрицятнень пельде. Прявт кевкстемакс кармасть китнень, ялго якамонь тротуартнэнь витнемась ды строямось, кудотнень перька ды общественной таркатнень вадрялгавтомась, жилищно-коммунальной хозяйствась, истя жо чеменев ведень ды лифттнэнь полавтомань стакачись. Эрицятне истя жо кевкстнесть социальной учреждениятнень витнемадост ды строямодост, уроз эйкакштненень эрямо таркатнень явомадост, каладозь кудотнестэ одс эрицятнень ютавтомадост, общественной транспортонть важодемадонзо, шумбрачинь ванстомань учреждениятнень одкстомтомадост ды эрицятнень медицинань обслуживаниядонть.
Эрицятнень пельде састь зярыя мельть-арсемат, конат сюлмавозь Саранскоенть вадрялгавтоманзо марто - Артём Здунов кирдинзе ды кармавтсь саемс важодемас.
Ульнесть кевкстемат специальной военной операциянь участниктнень семиятнень, СВО-нь ветерантнэнь пельдеяк. Весе сынь саезь башка ванновт алов.
Мордовиянь Прявтонь виде эфирэнтень састь малав 1000 кевкстемат республикань эрицятнень пельде. Весе пшкадематне, конат эзть яволявтово трансляциянть шкасто, кучовить министерстватнес, ведомстватнес ды муниципалитеттнэс ванноманть-важодеманть ды тевтнень кемекстамонть туртов.
Васенцеде виде эфирэсь ютась од лувсо - «Всероссийской государственной телевизионной ды радиовещательной компаниянь» («Мордовия» ГТРК-нь) площадкасо. Истя жо эсест ресурстнэсэ виде эфирэнь трансляциянть ютавтызь «Народное телевидение Мордовии», ВК-со ды ОК-сэ «Республика Мордовия» официальной пабликтне. Теде башка, текстэнь виде трансляциянть топавтызь «Известия Мордовии», СМИ-тне ды республикань блогертнэ.
Мордовия Республикань Прявтонь Пресс-службась