Дмитрий Чернышенко: "Мордовиянь госуниверситетэнь 50% тонавтницятне ютыть стажировка региононь инновациянь предприятиятнесэ"

Дмитрий Чернышенко: "Мордовиянь госуниверситетэнь 50% тонавтницятне ютыть стажировка региононь инновациянь предприятиятнесэ"

Ожоковонь 22-це чистэ Саранскойсэ важодемань коряс улемстэ Россиянь Правительствань Председателень полавтыцясь Дмитрий Чернышенко Мордовиянь Прявтонть Артём Здуновонь марто вейсэ якась Н.П.Огаревонь лемсэ МГУ-нь биотехнологиянь ды биологиянь факультетэнтень. 

Вице-премьерэнтень невтизь университетэнь виевгавтомань программань топавтоманть ды «Приоритет-2030» стратегической академической лидерствань программань грантонь базовой пельксэнть топавтомань коряс аравтлувонть. Дмитрий Чернышенко тешкстызе, грантонть вельде университетсэнть топавтозь покш технологиятнень производствань коряс 4 проектт, ветяви ероков важодема региононь важодема таркатнень максыцятнень марто вейсэнь тевдеемань сюлмотнень кемекстамонть коряс. 

"Правительствась лезды од специалисттнэнень, конат эрявить неень шкань конкуренциянь кирдеме маштыця масторсонть, ды университетсэнть теезь тонавтомань системась лезды топавтомс те тевенть. Улить наукас ды предпринимательствас од ломантнень тердемань программат, важоди технологической предпринимательтнень бизнес-клубось, стартаптнень фабрикась. Магистратурань ды аспирантурань 30% программатне топавтовить партнертнэнь марто вейсэ, 50% тонавтницятне ютыть стажировка региононь инновациянь предприятиятнесэ", - мерсь Дмитрий Чернышенко. 

Сон ваннынзе лабораториятнень. 

"Университетэсь теи покш путовкс региононь социально-экономикань виевгавтомантень, токши ламот енкстнэнь. Те искусственной интеллектэсь,  биокомпозиционной материалтнэ, энергообеспечениянь импульсной систематне ды фармацевтикань промышленностесь. Интеллектуальной ули-паронь 50% объекттнэ совавтозь региононь экономикантень, 1,7-ксть покшолгавтозь вузонть путовксозо региононь валовой продуктонтень", - мерсь Дмитрий Чернышенко. 

Артём Здунов тешкстызе, Н.П.Огаревонь лемсэ МГУ-сь ашти региононь наукань, тонавтомань ды просветительской тевдеемань куншкакурокс. 

"Минек арсеманок коряс, вузось карми топавтомо Мордовиянть туртов зярыя прявт проектт: сы шкань медицинась; фотоникась, функциональной электроникась, цифровой решениятне ды искусственной интеллектэсь; од поколениянь материалтнэ ды энергосбережениясь; «превей» велень хозяйствась», - мерсь региононь Прявтось. Истя жо тешкстызе, проектэнть лувсо топавтовить малав 90 проектт. 

Мордовия Республикань Прявтонь пресс-службась