Республикань Кудосонть Мордовиянь Прявтонть марто вастовомасонть ваннозь региононь АПК-нь виевгавтомань туртов прявт кевкстематне, истя жо кортамось мольсь тундонь-паксянь тевтнень ютавтомадост, аграрийтненень лездамонь тевтнеде, инвестпроекттнэнь топавтомадост.
Республикань АПК-нь экономикань невтевкстнэ касыть. Истя, 2023 иестэ Мордовиясо велень хозяйствань производствань индексэсь икельдизе среднероссийскоенть. Масторонть коряс седе покш велень хозяйствань предприятиятнень рентабельностесь. Минсельхозось, эсензэ пельде, полады явомо производстватнень лездамонтень ды велень территориятнень виевгавтомантень финансированиянь редявикс покшолмат. Тедеде Мордовиянть туртов лимитэсь седе покш меленсенть коряс - 2,7 млрд целковойть.
Ярмактнень покш пельксэсь явови велень территориятнень виевгавтомантень. Республикась свалшкане – профилень госпрограммань ероков участник. Сонзэ мероприятиятне ютазь 4 иетнень перть токшинзе малав 236 тежат ломантнень. 2024 иестэ Мордовиясо истя жо арсеви строямс зярыя объектт.
Аволь умок республикасонть ушодовсть тундонь паксянь важодематне. Озимойтнень подкормась токшинзе уш пеледест ламо паксятнень, яровоень видемась ютавтозь малав 15 тежат гектартнэсэ. Дмитрий Патрушев явсь мель производстванть туртов эрявикс весе ресурстнэнь улеманть ды доступностенть коряс ванномань эрявиксчинть лангс. Мелят Мордовиясо малав весе культуратнень коряс одкстомтозь рекордонь невтевкстнэ. Минсельхозось арси, видемань покшолматнень структураст топавтомаст пингстэ регионось малавгады мелень невтевкстнэнень.
Артём Здунов тешкстызе: велень хозяйствась – республикань экономикань прявт енкс. «Минек агропромышленной комплексэсь невти вадря динамика. Мордовиянь товаронь производительтне теить эсь путовксост масторонь ярсамопелень безопасностень топавтомантень, сынст продукциянть ули экспортонь вадря потенциалозо», – тешкстызе сон.
Велесэ важоди Мордовиянь эрьва ветеце экономикань коряс ероков эрицясь. 2023 иестэ велень хозяйствань валовой продукциянь покшолмась кармась 119 млрд. целковойть, производствань индексэсь – 105,6%.
Государствань свалшкань лезксэнть, Россиянь Минсельхозонть марто вейсэнь тевдееманть вельде Мордовиясь сови васенце регионтнэнь юткс вейке эрицянть лангс продукциянь прявт видтнэнь производстванть коряс. Республикась целанек топавты эсь прянть ярсамопельтнесэ ды малав 60% нолдавиця продукциянть пачти региононть томбалев. Мордовиясо – сехте рамавиця потребителень парготнень ютксто вейкесь.
Ней республикань велень хозяйствасонть топавтовить 13 покш инвестпроектт, инвестициятнень вейсэнь покшолмась – 6 млрд целковойтнеде седе ламо. Мелят Мордовиянь аграрийтне пурнасть региононь весе историянть перть рекордонь урожай – 2 млн 80 тежат тоннат, урожайностенть коряс сайсь васенце тарка ПФО-нь регионтнэнь ютксо.
Прявт тевтнень ютксо – органической велень хозяйствась. Республикась вети те енксонть Россиянь Федерациянь Президентэнть Владимир Путинэнь кармавтоманзо коряс. «Минь соватано ТОП-5 регионтнэнь юткс сертифицированной производительтнень ламочист коряс. Колмо иетнень перть органической производстванть туртов нолдазь тевс модань 7 тежат гектарт. Республиканть туртов «органикань» виевгавтомась – те эште вишка ды средней предпринимательствань, фермерэнь хозяйстватнень, велень туризмань стимулированиянь, велесэ занятостень кастомань енкс», – тешкстызе Артём Здунов.
Мордовиянь Прявтось евтась сюкпря Дмитрий Патрушевнень производственной проекттнэнь кирдемаст кисэ, истя жо велень территориятнень весемеендонь виевгавтоманть кисэ. «Минь бажатано весемеендо виевгавтомс нежедемань пункттнэнь, ды Россиянь Минсельхозонь лезксэсь тесэ пек питней, – мерсь Мордовиянь руководителесь. – Те истя жо ответственность минек туртов - неть ярмактнень лангс миненек эряви весементь шкастонзо строямс. Ды лия программатненьгак минь истя жо аравтано тень лангс».
Мордовия Республикань Прявтонь пресс-службась