Мордовиянь Прявтонть тевтнень топавтыцясь Артём Здунов телефононь коряс евтась поздоровт Изнямонь Чинть кувалма Ине Отечественной войнань ветерантнэнень

Мордовиянь Прявтонть тевтнень топавтыцясь Артём Здунов телефононь коряс евтась поздоровт Изнямонь Чинть кувалма Ине Отечественной войнань ветерантнэнень

Изнямонь Чистэнть Мордовиянь Прявтонть тевтнень топавтыцясь Артём Здунов телефононь коряс евтась сюкпря Ине Отечественной войнань ветерантнэнень ратной подвигенть кисэ, конань вельде масторось олякстомтозь фашистэнь тандавксонть эйстэ. Поздоровт евтазь Орданьбуестэ Петр Фомич Кучаевнень, Лямбирень енксонь Александровка велестэ Михаил Семенович Романовнень, Саранскойстэ Виктор Николаевич Куликовнень,  Ицялонь енксонь Смольный поселкасто Константин Алексеевич Винокуровнень ды Саранск ошонь округонь Горяйновка велестэ Михаил Семенович Борискиннэнь.

"Евтан седейшкавань поздоровт тыненк ды весенень, кить течи тешкстыть мартонк Изнямонь Чинть, - мерсь Артём Алексеевич Михаил Семенович Борискин марто кортамсто. - Кеме шумбрачи тенк, минь кирдтянок каштанчи, минек республикасо улить истят геройть. Весементь сехте вадрянть тенк! Монень мельспаро, минь Тынк марто землякт".

"Истя, мон чачинь Отяжбуень енксонь Киржеманы велесэ, - мерсь Михаил Семенович. - Ней тосо кадовсть весемезэ ниле ветерант, минденек пек аламо. Сюкпря поздоровтнень кисэ!"

Республикань руководителенть марто кортамсто ветеранось евтнесь важодемань ды военной кинть коряс. Зярдо ушодовсь войнась, сон, 14 иесэ церынесь, важодсь колхозсо, эзть сато важодиця кедть. 1944 иестэ саезель фронтов. Тонавтнемань частенть прядомадонзо мейле понгсь связень войскас. Воевась Западонь фронтсо - Венгриясо. Кудов, Мордовияв, велявтсь 1951 иестэ сержантокс. Войнадо мейле важодсь тиринь велень колхозсо, сонензэ максозь «Заслуженный работник сельского хозяйства» почетонь лемесь. Михаил Семеновичень 4 эйкакшонзо, 7 нуцьканзо ды 3 правнуцьканзо.

Петр Фомич Кучаев службав саезель. 1944 иестэ, служась Дальней Востоксо 1947 иенть самс, мейле Германиясо. Сон чачсь Орданьбуень енксонь Чукал велесэ, войнадо мейле эрямонзо алтызе тиринь енксонтень, велень хозяйствантень.

Михаил Семенович Романов служамо саезель 1943 иестэ, воевась пулеметно-артиллерийской батальонсо, войнадо мейле важодсь колхозсо. Кастсь 8 эйкакшт, сонзэ 10 нуцьканзо ды 12 правнуцьканзо.

Виктор Николаевич Куликов 1943 иестэ саезель фронтов Дальней Востоков, ульнесь Маньчжуриянь олякстомасо. Войнанть прядовомадонзо мейле 7 иеть служась Сахалинсэ. Тиринь енксов велявтомадо мейле важодсь токарекс Саранскоень экскаваторонь заводсонть, 44 иеть аштесь станок икеле. Кавто эйкакшонзо, 2 нуцьканзо, 2 правнуцьканзо.

Константин Алексеевич Винокуров армияв саезель 1942 иестэ, 16 иесэ. Служась артиллериянь полксо. 1945 иень даволковсто Гданьскойсэ крепостенть ды аэродромонть олякстомсто стакасто ранязель пильгес, конань савсь керямс. Госпитальсэ сон вастызе Изнямонь Чинть. Константин Алексеевичень 4 эйкакшонзо, 9 нуцьканзо, 17 правнуцьканзо ды 4 праправнуконзо.

Сюконятанок икеленк, вечкевикс ветерант! Сюкпря Изнямонть кисэ!

Мордовия Республикань Прявтонть пресс-службась