Мероприятиясь пурнась малав тёжа участникть Россиянь эрьва кодамо регионсто. Прявт темась -эйкакштнень духовно-нравственной тонавтомась-превс путомась.
«Минь тынк марто эрятано башка шкасто, ансяк те веши минек башка ответственность сень кисэ, мезе минь тейтяно, эрьвась эсензэ таркасо. Башка ответственность - тонавтыцятнень лангсо, сеттнень лангсо, кить тонавтыть-превс путыть од ломантнень. Пек покш ответственность – духовенстванть лангсо, мекс духовенствантень вешематне течи кастозь истя, што икелень шкань бачкатне превсэяк эзть кирде, зяро кевкстемат сыть тенст приходской тевдееманть ладямонзо коряс. Ансяк те весемесь алкукс эряви сень туртов, штобу миненек вейсэ топавтомс весе стакачитнень, конат зярс аштить минек раськень кинть лангсо. Ды мон кеман, истят промкстнэ служить минек общественной отношениятнень одкстомтомань вадря тевентень ды лездыть витемс тевтнень, конат течи аштить масторонть икеле ды юткстонок ламотнень икеле», – тешкстызе Московонь ды Весе Русень Иневанькс Патриархось Кирилл.
РФ-нь просвещениянь министрась Сергей Кравцов ёвтась сюкпря апак лотксе мелень явоманть кисэ, конань Рузонь православной церьковась яви минек масторонь трямонь-кастомань, тонавтомань, историянь просвещениянь ды свалшкань питнейчитнень ванстомань кевкстематненень.
«Кевкстематне, конат сюлмавозь свалшкань духовно-нравственной питнейчитнень марто, течи талновтыть эрьва тонавтыцянть. Сень эйстэ, кода минь тонавтсынек-превс путсынек од ломантнень, ашти минек масторонь вандынь чись. Россиянь Президентэнть кармавтоманзо коряс превс путомась велявтсь школатнес. Течи кемекстазь тонавтомань вейкине программат весе предметтнэнь коряс, тонавтомань-превс путомань вейкине программат, анокставить вейкине учебникть. Те юр, конань лангсо строяви Россиянь тонавтомань вейкине пространствась, минек раськень идентичностесь ды культурань-питнейчинь суверенитетэсь.
Явтано мель тонавтыцятненень лездамонтень, тонавтыцянь профессиянть пек эрявиксэкс теемантень – педвузсо пелькстамось пачкоди 12 ломаньс таркантень. Минек тевдеемань прявт ёнкстнэ ды изнявкстнэ тешкставить образованиянь виевгавтомань Стратегиясонть, конань анокстамось ветявсь профессиональной сообществанть марто вейсэ», - тешкстызе Россиянь Минпросвещениянь прявтось.
Вастовоманть анокстыцятне-ютавтыцятне - Религиозной образованиянь ды катехизациянь синодальной отделэсь ды Россиянь Федерациянь Просвещениянь министерствась. Мероприятиясь ютавтозель Церькованть ды тонавтомань сообществанть ютксо кортамонть кемекстамонть, эйкакштнень ды од ломантнень духовно-нравственной тонавтомань-превс путомань коряс вийтнень вейсэндявоманть ды педагогтненень лездамонть туртов.
Вастовомантень пурнавозетнень ютксо – Мордовиясто колмо тонавтыцят. Чаунзань 1 № лицеень историянь ды обществознаниянь тонавтыцясь Галина Труханова «Образование» нацпроектэнть лувсо аволь весть лиснесь изницякс РФ-нь сехте вадря тонавтыцятнень ютксо пелькстамосонть. Галина Анатольевнань тонавтницянзо парсте невтить пряст эрьва кодамо уровнянь мероприятиятнесэ.
Светлана Мирончевань прявтсо Чаунзань 1№ лицейсэ важоди школань историянь-краеведениянь музей. Сон аволь весть лиснесь изницякс ды призёрокс эрьва кодамо пелькстамотнесэ, 2020 иестэ саезь ловови Московонь Изнямонь Музеень партнёрокс ды прими участия «Школьный музей Победы» программасонть.
Саранскоень 36 № школань биологиянь ды химиянь тонавтыцясь Наталья Буянкина 39 иеть алтась педагогонь важодемантень. Меельце иетнестэ анокстась биологиянь ды экологиянь коряс школасо тонавтницятнень Весероссиянь предметной олимпиадань региононь уровнянь вете призерт. Наталья Михайловна - «Мир возможностей» партиянь проектэнь акциятнень школань куратор.
Мордовия Республикань Прявтонь Пресс-службась