Недлясто, декабрянь 11-це чистэ, Владимир Волков ванкшнызе Мордовиянь артыцянть Никита Пичугинэнь выставканть. Экспозициясь, конантень совасть мастерэнть 100 ламо важодевксэнзэ, конат анокстазь меельце 5 иетнень перть, панжовсь декабрянь 1-це чистэ С.Д.Эрьзянь лемсэ Изобразительной искусствань музеень выставкань залсонть Республикань Прявтонть лезксэнзэ вельде. Выставканть авторось алтызе тетянстэнзэ – содавикс артыцянтень Валерий Пичугин. Панжомо чистэнть выставканть ванномо сакшность 500 ламо ломанть. Никита Пичугин – од, ёроков мастер, прядызе Ф.В.Сычковонь лемсэ Саранскоень художественной училищанть, 2011 иестэнть саезь Россиянь Художникень союзонь член, сеедьстэ невти Мордовиянь изобразительной искусстванть Россиянь ды раськеютконь выставкатнесэ ды форумтнэсэ. Сонзэ важодевксэнзэ ванстовить Россиянь, Германиянь, Франциянь, США-нь, Канадань корпоративень ды частной коллекциятнесэ.
С.Д.Эрьзянь лемсэ МРМИИ-нть выставкась – васенце башка выставка чачома ёнкссонть. Владимир Волков покш мель марто ванкшнызе экспозициянть, явсь мель важодевкстнэнь башка тешкстнэнень. Республикань Прявтось тешкстызе оймень видечинть ды лиризманть, конанть марто артыцясь сёрмады тиринь ёнксонь пейзажтнэнь – кода велень, истя ошоньгак.
«Неть картинатне – простойть ды теке шкастонть пек мазыйть, сынст эйсэ редяви перть пельксэнть лексемазо, тиринь ёнксонь мазычись… Арсян, секскак Никита Пичугинэнь шкинемазо пек вечкеви неень шкань живописень чарькодицятненень, выставкась кармась алкуксонь кенярксчикс Мордовиянь прявтошонь эрицятненень ды инжетненень», – мерсь Республикань Прявтось.