Декабрянь 14-це чистэ Мордовия Республикань Прявтось Владимир Волков примась участия тонавтнемань-методикань промкссонть, косо ванкшнозельть 2016 иестэ ПФО-со РФ-нь субъекттнэнь РСЧС-нь таркань подсистематнень важодемань итогтне ды путозь тевть 2017 иентень. Вастовомась ютавтовсь Россиянь МЧС-нь Равчирень региононь центрань прявтонь полавтыцянть Игорь Паньшинэнь прявтонзо ало.
Вастовомантень пурнавкшность Равчирень федеральной округсо Россиянь Федерациянь субъектнэва Россиянь МЧС-нь Прявт управлениянь прявтнэ.
«Минек тонавтнемань-методикань промксось ютавтови гражданской оборонань, апак учонь зыянов тевтнень а нолдамонь ды куроксто витемань коряс Россиянь МЧС-нь Равчирень региононь центрань прявт мероприятиятнень лувсо, - мерсь шумбракстнемань валонь ёвтамсто В.Д.Волков. - Минек туртов мельспаро вастомс инжеть. Мордовиясо улить икелев молиця важодевкст апак учонь зыянов тевтнеде эрицятнень ды таркатнень ванстомадо. Промксонь программанть лувсо минь бажатано невтемс участниктненень сеть объектнэнь, кодат арасть Равчирень округсонть».
Республикань прявтнэ явсть ды анокт седе товгак явомс весемеёнксонь лезкс эрицятнень апак учонь зыянов тевде ды техногенной кажодо ванстоманть коряс путозь тевнень топавтомантень.
Мордовиянь правительствась путы покш ярмакт МЧС-нь учреждениятненень неень шкань техниканть, оборудованиянть ды снаряжениянть рамамга. Меельце 2 иетнень перть республикань бюджетэнь ярмактнень лангс рамазь таркасто таркас пачтявиця теплодымокамерат, КАМАЗонть юрсо таркасто таркас пачтявиця управлениянь пунктонь 2 автомобильть, берянь таркава ютыця оперативно-служебной автомобильть.
Маласо иетнестэ регионсонть арсевить стявтомс покш объектт, конат топавтсызь Мордовиянь МЧС-нь Прявт управлениянь виев инфраструктуранть. Сы иестэнть Саранскойсэ строяви 10 машинас толонь мадстемань-идемань куншкакуро малав 3,5 тёжат кавонзазь метрань покшолмасо. Тосо кармить улеме вешнемань-идемань отрядонь ды толонь мадстемань-идемань частень Равчирень филиалось.
Истя жо сы иестэнть ули витнезь зданиясь Специализированной толонь мадстемань-идемань частенть туртов, тосо кармить улеме МЧС-нь важодицятнень тренировкатнень туртов нупальтне. Перьканзо кармить теезь скалодром ды стакачинь печтямонь полоса. Теде башка, маласо шкастонть арсеви стявтомс Кризисэнь тевстэ управлениянь од куншкакуро.
Весе неть объекттнэ кармить стявтовомо 2018 иень Футболонь коряс мирэнь чемпионатонтень республиканть анокстамонть лувсо. Учови, те шкантень апак учонь зыянов тевтнеде эрицятнень ды таркатнень ванстомань важодемась седеяк виевгавтови. Покш тарка тенесэ саить МЧС-нь важодицятне.
«Неть условиятнесэ Чрезвычайной ситуациянь анолдамонь ды витемань государственной вейкине системанть (РСЧС-нь) республикань территориянь подсистеманть тевдеемась ашти прявтокс стабильностенть ванстомасонть. Сонзэ важодеманзо мельга пштистэ ванны республикань Правительствась. Гражданской оборонань кевкстематнень коряс прявт тевень республикань планонть коряс те иестэнть минь ютавтынек республикань районтнэнь марто командань штабонь 5 тонавтнемат ды тренировкат, тактикань-специальнойть 5 тонавтнемат ды 15 тренировкат, - тешкстызе Мордовиянь Прявтось. - Ютавтозь мероприятиятне, истя жо авариятнень витемань коряс практикань важодемась невтизь, управлениянь органтнэ, Чрезвычайной ситуациянь анолдамонь ды витемань вейкине системанть вийтне ды систематне минек республикасо теезь ды анокт топавтомс путозь тевтнень сэтьме шкастонть ды войнанть пингстэ».
Истя жо Владимир Волков ётнесь Мордовиянь МЧС-нь важодицятнень идемань тевдест. Истя, колмо чиде икеле идицятне эзть максо прядомс прянзо Рузаевкань 22 иесэ цёранть. Сынь куроксто састь зыянонь таркантень ды кортызь од ломаненть а кирнявтомс 50 метрань сэрьсэ вышкастонть. МЧС-нь важодицятне васняяк кортасть мартонзо, мейле вейке идицясь кузсь вышканть пряс, ды кортызе церанть валгомс алов.
«Те вадря невтевкс, зярдо ломантне анокт максомс эсь шумбрачист-эрямост, теемс подвиг, конань минь ловтано эрьва чинь тевекс. Тевекс, конанть лезксэнзэ вельде идевить сядот, тёжат эрямот, - редизе В.Д.Волков. - Содан, ламонень сетнень эйстэ, кить течи пурнавсть те залонтень, аволь весть савкшность вастовомс истямо тев марто, невтемс смелчинть ды а пелемачинть. Ёвтан сюкпрянь валт минек идицятненень эсь тевест вадрясто топавтоманть кисэ ды эрьва минутасто лездамо само анокчинть кисэ. Сюкпря тенк, вечкевикс ялгат!»
Сы шкань важодемадонть кортамсто, Игорь Паньшин мерсь, ведомствантень эряви топавтомс вешематнень ды совавтомс эрямос сеть кармавтоматнень, конатне тешкстазь Россиянь Президентэнть В.В.Путинэнь маень Указтнэсэ, ванстомс сэтьмечинть 2017 иень Конфедерациятнень кубоконть ютавтомсто, ванстомс эрицятнень сэтьмечист 2018 иень Футболонь коряс мирэнь чемпионатонтень анокстамонть лувсо ды лият.
«Мордовиянь МЧС-нь службась сови икельцетнень юткс Равчирень федеральной округсонть, - мерсь И.В.Паньшин. - Важодемань иень невтевкстнэнь коряс, республикасонть тешкстазь вадря ёнов полавтомат. Эрязасто моли анокстамось 2018 иень футболонь коряс мирэнь чемпионатонтень. Арсеви, 2017 иестэ региононтень пачтяви авариянь-идемань техникань эштё вейке партия».
Мероприятиянть лувсо явшевсть ведомствань казнеть. Россиянь МЧС-нь Мордовия Республикасо ГУ-нь прявтонтень Андрей Наумовнень максть «За заслуги перед Отечеством» II степенень орденэнь медаль.
Истя жо Мордовиянтень максозь толонь мадстемань-идемань неень шкань техникань образецт. Од техникась лезды виевгавтомс ды одкстомтомс региононь толонь мадстицятнень ды идицятнень подразделениятнень базатнень.