Цетвергстэ, умарьковонь 29-це чистэ, Мордовиянь Прявтось Владимир Волков ульнесь кенярксчинь промкссонть, конась алтазель «Технопарк-Мордовия» АУ-нь теевема чистэнть 10 иетнень топодемантень, ёвтась поздоровт юбилеенть кувалма ды явшесь государственной покш казнеть.
Мордовиянь технопарконь конференц-залонтень пурнавкшность учреждениянь важодицятне, Научно-технического советэнтень ды Наблюдательной советэнтень совицятне, резидентэнь компаниятнень представительтне ды лият.
«Мон ёвтан шумбракстнемань валт минек инжетненень, минек вадря ялгатненень, коллегатненень ды кемевикс партнёртнэнень, кить састь эрзянь-мокшонь моданть лангс! – пшкадсь пурнавозетненень Владимир Волков. – Весе, кить састь те залонтень, тейсть лезкс «Мордовиянь Технопарконть» теевемантень ды виевгавтомантень. Секскак мон ёвтан сюкпря эрьвантень эйстэнк минек республикань инновациянь покш куншкакуронть виевгавтомантень лездамонть кисэ!»
Республикань Прявтось ледстизе, Мордовиясо технопарконь теемась арсевсь умок. Регионсонть ульнесть промышленной проектт ды вадря компетенцият ламот отраслятнень коряс, конатненень путозь ушодкс эштё советской шкатнестэ. Ансяк арасель инновациянь пурнамонь вейкине куншкакуро, косо бу вейсэндявольть научно-производственной ды бизнес-ресурстнэ. «Федеральной кочкамонь вешематнень коряс Мордовиясь эзь юта зярыя ёнкстнэва. Васняяк, минь аволь ош-«миллионник» (а истямо вешема ульнесь). Истя жо эрявсь Россиянь Наукань академиянь филиал. Минь ламо арсинек, кортынек, ютавтынек вастовомат, невтинек бажамонок-арсеманок алкуксчинть, – ёвтнесь Владимир Волков. – Кода кортась Гай Юлий Цезарь, «ине тевтнень эряви топавтомс, аволь певтеме арсемс лангаст». Неть валтнэ целанек кандовить минек Президентэнтень, се шкане Россиянь Правительствань Председателентень. Самай сон кемекстызе меленть теемс Мордовиясо покш технологиянь сферасо Технопарк. Россиянь Федерациянь Правительствань распоряжениясь тешкстазь 2008 иень таштамковонь 12 чистэ».
Мордовиянь Прявтось толковизе, 2009 иень якшамковсто Россиянь Торгово-промышленной палатасонть невтевсь Мордовиянь технопарконь проектэнь презентациясь. Республикань делегациянть лембестэ вастызе ТПП-нь президентэсь Евгений Максимович Примаков. Теке жо иень панжиковонь 14-це чистэ «Мордовиянь Технопарконь» проектэсь невтезель Россиянь Президентэнтень Д.А. Медведевнень. «Миненек удалась кемевтемс масторонь прявттнэнь, Мордовиясь анок инновациянь эскельксэнтень ды те кинь ёнксонть эряви путомс Технопарксо, – мерсь В.Д.Волков. – Шкась невтизе, В.В. Путинэнь мелесь ульнесь вейкине видекс».
Эсь кортамосонзо республикань Прявтось тешкстызе кода кассь Технопарконьв ажодемань лезэвчись меельце 5 иетнестэ. Прядовсь базовой инфраструктурань теемась. Те шканть перть резиденттнэ лаомлгадсть 3-ксть. Ней те 128 компаният, конат топавтыть 350 ламо проектт. Сынст продукциянь ды услугань покшолматне 5 иетнень перть кассть 9-ксть ды кармасть 12 млрд. целковойть. Ансяк мелят Технопарконь резиденттнэ путсть малав 2,5 млрд. целковойть, нилеце пельксэсь эйстэст – научной ванкшноматнес ды разработкатнес. Импортонь полавтыця продукциянь миеманть эйстэ выручкась кармась 10 млрд. ламо целковойть иезэнзэ, эщтё 2 млрд. целковойть макссь экспортось.
Мелят Россиянь Кластертнэнь ды технопарктнень ассоциациянь рейтингенть коряс «Мордовиянь Технопаркось» совась масторонь колмо сехте вадрятнень юткс. «Ламосо те изнявсь сень вельде, уш тевдеемань ушодомсто минь видестэ тешкстынек Технопарконь специализациянть ды кочкинек «касомань точкатнень». Те, монь ванновтон коряс, самай эзь сато Россиянь башка технопарктненень», – тешкстызе Владимир Волков.
Мордовиянь Прявтонть валонзо коряс, технопарконь пешксе важодеманть туртов эрявсть тердемс содавикс ученойтнень ды разработчиктнень компетенцияст. Те тевенть топавтоманзо туртов теезель Научно-технической советэсь – управленяинь лия ёнов а молиця органось, кодамо арась лия технопарктнесэ. «Тесэ эряви ледстямс Вячеслава Константинович Осиповонь, Госдумань Наукань ды наукоемкой технологиянь коряс комитетэнь прявтонь полавтыцянть. Сон ламо важодсь научно-технической советэнь теемань кевкстематненьк оряс, тердсь тов покш ученойтнень. Ды течи мон ёвтан покш сюкпря НТС-нь эрьва членэнтень свалшкань лезксэнть ды весе уровнятнесэ минек проекттнэнь кирдемаст кисэ! Башка сюкпря сонзэ председателентень Е.Н. Кабловнень!» – пшкадсь пурнавозетненень В.Д.Волков.
Мордовиянь Прявтось тешкстызе, Технопарконь специализациянть кочкамсто нежедсть республикасонть улиця научно-производственной потенциалонть лангс. Васняяк те светотехникась. Саранскоесь свал ульнесь «валдонь прявтошокс». СССР-сэ нолдавиця валдонь 90% ламо источниктне теевсть Мордовиясо. «Технопарконть вельде миненек удаласт=ь аволь ансяк ванстомс, истя жо вельмевтемс те сюпавчинь сехте вадря ёнкстнэстэ вейкенть. Мон кортан Лодыгинэнь лемсэ НИИИС-нть коряс, конат мелят тешкстызе 60 иень юбилеенть. Сонзэ юрсо теезь Технопарконь производственной комплексэсь, сонсь институтось кармась васенце резидентэкс», – башка тешкстызе Владимир Волков.
Ней Лодыгинэнь лемсэ НИИС-сь одкстомты эсь тарканзо, топавты наукань од разработкат светотехникань коряс. Институтонь опытной производствасонть теевить 500 типте ламо лампат, истя жо Оборонань министерстванть, авиациянть, флотонть ды космосонть туртов.
МР-нь Прявтось тешкстызе, Технопарконть туртов прявт ёнксокс течи ашти волоконной оптикась ды оптоэлектроникась. «Те кевкстеманть коряс минь важодтянок уш малав 20 иеть. Покш ризксэс, тедеде тусь эрямостонть минек важодемань прявт идеологтнень эйстэ вейкесь, академикесь Евгений Михайлович Дианов. Се видьмесь, конань путызе Евгений Михайлович оптоэлектронной промышленностень виевгавтомантень, уш максы ды эштё карми максомо норов маласо шкастонть, – мерсь В.Д.Волков. – Отечественной оптоволокнань производствань ладямодо мелесь минек чачсь эштё 90-це иетнень прядовомсто. 2000 иестэ республикасонть панжовсь оптической кабелень васенце производствась. Теке шкане омбо масторонь компаниятне пачтясть оптоволкно Россияв васняяк эсест заводтнэс. Аволь свалшкань пачтямотнень вельде Россяинь предприятиятне вастневсть свалшкане лоткавтнес важодемаст. Минь саинек мель витемс те стакачинть. Ансяк проектэнь топавтоманть пек кирдсь кризисэсь. Миненек савсь лоткавтомс сонзэ. Те шканть перть масторлангсонть волокнань производствань технологиятне свалшкане одкстомтомвсть. Ансяк минь чарькодинек волокнань эсенек производствань покш эрявиксчинть. Саезель мель поладомс проектэнь топатвоманть, апак вано тандавкстнэнь лангс. Минь келейгавтынек проектэнть кластерэнь уровняс».
Ледстястизе, 4 иеде икеле Саранскойсэ ушодызе важодеманзо оптической волокнань нолдамонь коряс Россиянь келес вейкине заводось. Те васенце пельксэсь. Омбоце очередьсэнть арсеви нолдамс преформат. «Мордовиянь Технопаркось» икеле молиця научной куншкакуротнень марто вейсэ важодить пек ванькс кварцевой материалтнэнь производстваст коряс. Зярс сынсь усковить омбо мастортнэстэ.
Кода тешкстызе Мордовиянь Прявтось, нейпрявт тевесь – теемс производствань пешксе цикланть: оптической волокнань туртов аноктсавкстнэнь эйстэ саезь сонзэ юрсо приботрнэнь ды оборудованиятнень видьс. Региононь руководителенть валонзо коряс, те ёнкссонть прявт проектэкс ашти волоконной оптикань Инжинирингень куншкакуронь теемась. Ней путозь оптической волокнань таргамонь туртов васенце 10 метрань башнясь, строязь азотонь, водородонь ды кислородонь генерациянть туртов станцият, истя жо азотонь газификациянь система. Панжозь лазерэнь технологиятнень ды волоконно-оптической компоненттнэнь лабораториятне. «Виктор Васильевич (Якуба), эряви эрязкадомс. Сы иестэ ИЦВО-со нолдавост специальной волокнатнень ды волоконной световодтнэнь васенце «коммерческой» партиятне, – мерсь Владимир Волков. – тень туртов мине кули весемесь. Минь муинек лезкс Россиянь Минторгсо. Технопарксонть удалась вейсэндямс фотоникиант, волоконной оптикань ды приборостроениянь коряс наукань икеле молиця весе куншкакуротнень компетенцияст. Минек нолдазь тевс кадратнень анокстамонь ламо эскельксэнь программась. Улить практической результатт, анокт НИОКР-тне, конатнень эряви совавтомс производствас».
МР-нь Прявтось тешкстызе, ИЦВО-нь проектэсь саи покш тарка инновациянь ёнкссо вишка ды средней бизнесэнь виевгавтоманть туртов. Тедеде Мордовиясь вадрясто ютызе «Малое и среднее предпринимательство» раськень проектэнть лувсо Минэкономразвитиянь конкурсонь кочкамонть. Сонзэ коряс «Мордовиянь Технопарконтень» кавто иетнень перть явови субсидия 500 млн целковоень покшолмасо. Неть ярмактне явовить инновациянь вишка компаниятненень лездамс, конат важодить фотоникань ды оптоэлектроникань коряс, сынст улить лиятнень ёнов а молиця промышленной образецэст ды разработкаст, конат ванствоить интеллектуальной собственностесэ.
Владимир волков ёвтызе, Технопарконь эштё вейке прятв проектэсь – Инновациятнень проектированиянь куншкакурось, конась лезды ансяк ушодозь тевстэнть лисемс устройстватнень ды прибортнэнь опытной образецтнэнь нолдамонтень: электронной моделенть анокстамонзо эйстэ варчамотнень видьс. «Сонсь Куншкакурось уш анок, оборудованиясь путозь. Ней моли ЦПИ-нь научно-испытательной куншкакуронь варчамось. Виктор Васильевич (Якуба), эряви седе куроксто лисемс выручкань покшолматнес, конат лездыть Куншкакуронтень важодемс самофинансированиянь принципенть коряс», –тешкстызе МР-нь Прявтось.
Региононь Прявтонть валонзо коряс, лезэв важодема невти РОСНАНО-нь «Нанотехнологиятнень ды наноматериалтнэнь куншкакурось», конась важоди Технопарконть юрсою Мелят тесэ нолдазь химической од производствась, панжозь печатамонь гибридной электроникань лабораториясь. Ней наноцентрань портфельсэнть 70 ламо инвестициянь проектт, зярыятнесэ улить омбо масторонь партнерт. «Мон ёвтан сюкпря РОСНАНО-нь кирдийтненень ды Тыненк башка, Андрей Геннадьевич (Свинаренко), неть проекттнэнь кирдемаст кисэ. Кеман, минек вейсэнь аравтлувтне топавтовить, ды Технопарксонть панжовить од производстват», – мерсь Владимир Волков.
Тешкстазель, меельце 5 иетнень перть «Мордовиянь Технопарксо» теезь малав тёжа важодемань таркат, весемезэ компаниятнесэ-резиденттнэсэ важодить 2 тёжадо ламо ломанть. «Ды ламот эйстэст – вадря образования марто од ломанть. Бути аволь уле Технопаркось, весе сынь туевельть Московов, – тешкстызе Владимир Дмитриевич. – Ней минь нейтянок ляи примерт, зярдо минек ёроков од ломантне, масторонь содавикс вузтнэсэ тонатвнемадо мейле, велявтыть важодеме Технопарков. Невтемакс, неть эйкакштне, конатнень минь анокстынек Волоконной оптикань Инжинирингень куншкакуронтьтуртов ИТМО-со, Политехсэ, Высокочистной веществатнень химиянь институтсонть ды РАН-нь радиотехникань ды электроникань институтсонть, истя жо Финляндиянь Тампере ошсо Технологической университетсэнть. Те важодемасонть минек кирдимизь РОСНАНО-нь Инфраструктутарнь ды тонавтомань программатнень фондось».
Мордовиянь Прявтось тешкстызе, вейсэнь важодема ладязь Технопарконть ды Мордовиянь университетэнть ютксо. Те токши кадратнень аноктсамонть, вейсэнь проекттнэнь топавтоманть ды НИОКРатнень. Технопарксо, университетэнь лабораториянть юрсо, кастозь кремниень карбидэнь васенце кристаллось. Те проектэнтьк оряс важодить од ученойть ды студентт.
«Минь поладтанок тееме важодемань таркат од ломантень туртов, виевгавтомо кадратнень анкостамонь системанть, – мерсь Владимир Волков. – Те системантень совавтозь «Кванториум» эйкакшонь технопаркось. Технопарконь важодемань прявт изнявкстнэстэ вейкесь, од ломантнень ули мелест теемс эсест бизнес. Сынь нолдыть стартапт, теить лезэв арсемат ды технологият. Эсест прясост ды арсематнесэ путыть ки эрямонтень. Сынь арсить теемс мезе бути од, мезесь полавтсы эрямонть ды теемс сонзхэ седе вадрякс. Ды минь свал лездатанок минек од ломантненень неть бажамотнесэ! Секскак Технопарконь историясь – те вандынь чинь история. Кода вечкить кортамо омбо масторонь IT-корпорациятне, «сехте вадря лувось ёвтамс ваныднь чинть – те арсемс сонзэ».
Мордовиянь Прявтонть валонзо коряс, ней масторлангсонть молить технологиянь покш полавтомат. Россиянь Президентэсь В.В.Путин тешкстызе, покшолмаст коряс сынь малавикст промышленной революциянь ды наукасо панжовкстнэнь шканть марто, когнат полавсть эрямонть весе модамасторонть келес.
«Миненек а эряви кадовомс неть процесстнэнь эйстэ. Ды прявт тарка тесэ явови «Мордовиянь Технопарконтень». Нама, васенцекс карми улеме се, кинь кармить улеме эсензэ технологиянзо, содамочинзэ ды компетенциянзо. Тень туртов эряви келейгавтомс важодемань ёнкстнэнь, шкастонзо неемс од тенденциятнень ды касомань точкатнень, важодемс икельдязь, – тешкстызе Владимир Волков. – Аравтлувтнень вадрясто топатвоманть туртов ули прявтось – профессионализмась, важодемань вечкемась. Самай неть ёнкстнэ топавтыть Мордовиясо научно-технической прогрессэнть, лездыть шаштомс икелев».
Кенярксчинь мероприятиянь прявт пельксэкс кармась государственной покш казнетнень явшемась. Истя, Мордовия Республикань Прявтонть Указонзо коряс научно-технической потенциалонь виевгавтомасо покш изнявкстнэнь кисэ Славань I степенень орден максозь Каблов Евгений Николаевичнень – технической наукань докторонтень, профессоронтень Авиациянь материалтнэнь весероссиянь научно-исследовательской институтонь генеральной прявтонтень, «Мордовиянь Технопарконь» научно-технической советэнь председателентень.
Республикань Прявтонть Указонзо коряс научно-технической потенциалонь виевгавтомасо покш изнявкстнэнь кисэ Славань II степенень орден максозь Якуба Виктор Васильевичнень – "Технопарк-Мордовия" АУ-нь генеральной прявтонтень.
Мордовия Республикань Прявтонть Указонзо коряс научно-технической потенциалонь виевгавтомасо покш изнявкстнэнь кисэ Славань III степенень орден максозь Свинаренко Андрей Геннадьевичнень – "РОСНАНО" Управляющей компаниянь правлениянь председателень полавтыцянтень, Москов ош.
Славань III степенень орденсэ казезь Шпиленко Андрей Викторович – экономикань наукань кандидатось, Россиняь Кластертнэнь ды технопарктнень ассоциациянь прявтось, Москово ш;
Мордовия Республикань научно-инновационной виевгавтомантень покш путовксонть ды ламо иень перть вадря важодеманть кисэ "Лауреат Государственной премии Республики Мордовия" лемесь максозь Гурьянов Алексей Николаевичнень – химиянь наукань докторонтень, профессоронтень, Россиянь наукань академиянь Г. Г. Девятых лемсэ Пек ванькс вещетсватнень химиянь институтонь волоконной светодиодтнэнь технологиянь лабораториянь прявтонтень, Нижний Новгород;
Законностенть ды правовой мельтнень-арсематнень ванстомантень покш путовксонть кисэ «Заслуженный юрист Республики Мордовия» почетонь лемесь максозь Суркова Екатерина Вальерьевнанень – "Технопарк-Мордовия" АУ-нь исполнительной пррявтонтень;
Республикасо инновациянь процесстнэнь виевгавтомаст кисэ Мордовия Республикань Почётонь Грамотасо казезь Давыдова Наталья Михайловна – "Технопарк-Мордовия" АУ-нь целевой программатнень отделэнь прявтось;
Республикасо инновациянь процесстнэнь виевгавтомаст кисэ «За личный вклад в развитие Республики Мордовия» Мордовия Республикань Прявтонть Почётонь тешксэ казезь Белов Владимир Федорович – "Технопарк-Мордовия" АУ-нь инновациятнень проектированиянь куншкакуронь прявтось;
«За личный вклад в развитие Республики Мордовия» Мордовия Республикань Прявтонть Почётонь тешксэ казезь Стешин Владимир Иванович – "Технопарк-Мордовия" АУ-нь Технологиятнень ды инновациятнень кирдемань куншкакуронь интеллектуальной азорксчинь ведущей экспертэсь;
Мордовия Республикань Прявтонть распоряжениянзо коряс Мордовия Республикань Прявтонь Благодарность ёвтазь Баранов Владимир Сергеевичнэнь – "Технопарк-Мордовия" АУ-нь механикань ды теплотехникань отделэнь прявтонтень;
Мордовия Республикань Прявтонь Благодарность ёвтазь Карпов Александр Федоровичнэнь – "Технопарк-Мордовия" АУ-нь автоматикань систематнень ды электрической коммуникациятнень отделэнь прявтонтень;
Мордовия Республикань Прявтонь Благодарность ёвтазь Миронов Евгений Борисовичнень – "Технопарк-Мордовия" АУ-нь технической надзоронь коряс инженерэнтень;
Мордовия Республикань Прявтонь Благодарность ёвтазь Смирнов Сергей Александровичнэнь – "Технопарк-Мордовия" АУ-нь опытно-конструкторской важодематнень ды технологиятнень отделэнь прявтонтень.
Поздоровнь ды шумбракстнемань вал марто пурнавозетненень истя жо пшкадсть технической наукань докторось, профессорось, Авиациянь материалтнэнь весероссиянь научно-исследовательской институтонь генеральной прявтось, «Мордовиянь Технопарконь» научно-технической советэнь председателесь Евгений Каблов, экономикань наукань кандидатось, Россиняь Кластертнэнь ды технопарктнень ассоциациянь прявтось Андрей Шпиленко, Мордовия Республикань Правительствань Председателесь Владимир Сушков, МР-нь Госсобраниянь Председателень полавтыцясь Иван Москаев, Н.П.Огаревонь лемсэ МГУ-нь ректорось Сергей Вдовин, «Технопарк-Мордовия» АУ-нь генеральной прявтось Виктор Якуба ды лият.
Кенярксчинь промксонть лувсо «Мордовиянь Технопарконь» важодицятненень максовсть МР-нь Правительствань Почетонь Грамотат, МР-нь госсобраниянь Почетонь Грамотат ды МР-нь Госсобраниянь Председателень Благодарность.
Тешкстасынек, ютазь недлястонть Мордовиянь технопарконьв ажодицясь Сергей Немаев кузсь Эльбрусонь пряст. Куземанть сон алтызе «Технопарк-Мордовия» АУ-нь 10 иень юбилеентень. Предпряитиясонть важоди сонзэ теемань чистэнть саезь. Кода ледстни Сергей, куземс ульнесь пек стака, ансяк ловось, виев вармась, сиземась эзть меша куземс Россиянь ды Европань сехте сэрей пандонтень ды понгавтомс «Технопарк-Мордовия» АУ-нь флагонть 5 642 метрань сэрьсэ.