Неть читнестэ Мордовиянь Прявтось Владимир Волков вастовкшнось «Союз промышленников и предпринимателей РМ» роботань максыцянь региононь вейсэндявксонь председателенть Виктор Бирюков марто. Кортавсь вейсэндявксонть важодемадо, конань юрсо тееви покш робота республикань экономиканть кастомга-виевгадомга, ломантнень эрямонь уровененть кепедемга, социально-экономической сферасонть сюлмотнень кемекстамга.
Виктор Бирюков пачтясь республикань Прявтонтень вейсэндявксонть юрсо комиссиятнень пурнамодо. Истя, течинь чине улить комиссият внешнеэкономической, финансонь, страховамонь, лизингень ды аудиторонь тевтнень коряс, вишка ды покш бизнесэнь кооперациянть коряс.
Декабрянь 16-це чистэ Виктор Бирюков Россиянь Промышленниктнень ды предпринимательтнень союзонть пельде минек масторонь делегациянть юрсо прими участия Россиянь-Япониянь Бизнес-диалогсонть. Те пек эрявикс мероприятия кавто мастортнэнь вейсэнь важодеманть туртов кода экономикань сферасонть, истя жо регионтнэс инвестициятнень путоманть ламолгавтомасо. Те вастовомасонть Виктор Бирюков невтьсы Мордовия Республиканть.
Республикань Прявтось Владимир Волков тагояк тешкстызе, Мордовиясо инвестициятнень туртов ули пек паро ёнкс, роботы инвестортнэнень преференциянь механизмась, мезенть лувсо теевить вадря условият регионсонть важодеманть туртов. Тень коряс меельце иетнестэ Мордовиясо тевс нолдазь 200 ламо проектт, экономиканть виевгавтомантень путозь 200 миллиардт целковойть. 2015 иестэнть Мордовиясь инвестициянь климатонть вадрячинь национальной рейтингсэнть совась 20 сехте вадря регионтнэнь юткс.
Мордовия Республикань Прявтонть пресс-службась