Декабрянь 13-це чистэ Мордовиянь Прявтось Владимир Волков вастовкшнось Россиянь Финансонь министранть Антон Силуановонь марто. Кортамось мольсь финансонь иенть прядовомадонзо, конанть лувсо кемекстазель договоренность республикантень 5,7 млрд. целковоень покшолмасо кредитэнь максомадо икеле саезь обязательстватнень пандомс, истя жо 2,5 млрд. целковоень покшолмасо бюджетэнь кредитэнь явомадо, конат ютавтовить республикань бюджетэнь дефицитэнть финансированиянтень ды госдолгонть пандомантень.
Вастовомань итогтнеде кортамсто, Владимир Волков тешкстынзе сынст эрявиксчист республикасо финансонь тевтнень витемга: «Кемекстазь договоренностне лездыть 2017 иестэ киртямс госдолгонь пандомань расходтнэнь 700 млн. целковойс, ды неть ярмактнень минь ютавтсынек бюджетэнь васенце обязательстватнень финансированиянтень, сынст юткссо социальнойтне».
Теде башка, 2017 иес республикань бюджеттэнть кортамсто кемекстазь договоренность Мордовиянтень федеральной бюджетстэ финансонь лезксэнь явомадо, конат ютавтовить социально-экономической виевгавтомань прявт енкстнэс, сынст юткссо - 2018 иень Футболонь коряс мирэнь чемпионатонтень анокстамонь программанть топавтомантень.
Вастовомасонть примась участия Мордовия Республикань Финансонь министрась Алексей Симонов.
Мордовия Республикань Прявтонть пресс-службась