Вячеслав Федорищев, делегациянть марто шумбракстнемстэ, тешкстызе Самарань областенть ды Мордовия Республиканть ютксо вейсэнь тевдеемань сюпав историянть ды евтась кемема вейсэнь важодемань кемекстамосонть.
«Минь тынк марто аволь умок кортынек вейкень-вейкень содавтомадо, ды вана уш течи республикань правительствань покш командась тесэ важоди минек марто вейсэ, – пшкадсь сон Артём Здуновнень. – Мезесь эште питней минек туртов – важоди бизнесэнь покш делегациясь, эрьва енксонть коряс ней ютавтовить профилень вастовомат. Минек ули чарькодема: неть вастовоматне улест лезэнь кандыцят. Ламо проектт миненек эште сави теемс вейсэ».
Мордовиянь руководителесь евтась сюкпря Вячеслав Федорищевнень лембе вастоманть кисэ. Тешкстазель, регионтнэнь вейсэндить умонь ялгаксчинь сюлмотне – самай Самарань областестэ ютазь пингень ушодовомсто лиссь ушодксось Мордовиянь автономиянь теемадо. 20 иеде седе куватьс субъекттнэ вадрясто важодить вейсэнь тевдеемадо правительстватнень ютксо тешкстазь вейсладямонть лувсо.
«Ладязь чарькодевиця кавто ендонь вейсэнь тевдеема, те максы цетавкст. Самарань областесь – Мордовиянь товаронь производительтнень прявт потребительтнень ютксто вейкесь, – тешкстызе Артём Здунов. – Мелят Самарань областев груздязь продукция 12,4 млрд целковойтнень питнесэ. Карматано кастомо неть покшолматнень – келейгавтомо контрактациянть ды кооперациянть, нолдамо тевс экономикань башка зонань возможносттнень – те вадря инструмент».
Самарань областесэ эряви Мордовиянь промышленной комплексэнь, перерабатывающей отраслянь продукциясь. Мордовиянь Прявтось тешкстызе, неи возможностть кавто ендонь товарооборотонь кастоманть туртов.
Теде башка, Артём Здунов яволявтсь, республиканть Самарань областенть марто покшт арсеманзо культурань енкссо вейсэнь тевдееманть коряс. Вастовоманть шкасто примазь решения ютавтомс регионсонть Эрзянь-мокшонь культурань чить ды анокстамс Мордовияв Самарань делегациянь важодемань содавтоманть.
Мордовия Республикань Прявтонь Пресс-службась