Регионсонть эпидемиологиянь коряс тевтнеде пачтясь МР-ва потребительтнень праваст ванстомань ды ломанень паро эрямонь енкссо надозоронь коряс Федеральной службань Управлениянь руководителесь Татьяна Харитонова. Ней Мордовиясо тешкстави ОРВИ-сэ ды гриппсэ ормалгадомань сезононь касомась. Ютазь таргонть перть ормалгадозетне ламолгадсть 3,2%. Региононь медицинань учреждениятнесэ яволявтозь карантин. Ветяви эйкакштнень ламочист мониторингесь, конат а яксить школав ормалгадомань кувалма. Ней ве ендо тонавтни 41 класс республикань 11 школатнесэ.
Мордовиясо икелепелев ютавтозь покш важодема эрицятнень иммунизациянть коряс, истя жо ливкст путозь ломантненень, конат кандовить рискень группатнес – эйкакшт, сыре ломанть ды хронической орматнень марто ломанть, тонавтыцят, медикть.
«Ормалгадомань коряс тевтне аштить свалшкань ванновт ало – маласо шкастонть те невтевксэсь карми киртявомо. Тенень лездыть школасо тонавтницятнень тундонь каникулатне, конат ушодовить сы таргастонть», – тешкстызе Татьяна Харитонова.
Эрицятнень эрьва иень диспансеризациянь ютавтомадо евтнесь Мордовиянь шумбрачинь ванстомань министрась Олег Маркин. Сон тешкстызе, те важодемась ветяви кемекстазь аравтлувонть коряс. Те иестэнть профилактикань ванноматне (те истя жо профосмотратне, стандартной ды домкалгавтозь диспансеризациясь, истя жо репродуктивной иень ломантнень диспансеризациясь) ламолгадсь сахарной диабетэнь школатнень, пациенттнэнь туртов, конат печтясть инсультт, инфарктт, школатнень важодемаст вельде. Профилактикань медицинань лезкс истя жо явови шумбрачинь мобильной куншкакуротнень ды предприятиятнесэ ды учреждениятнесэ корпоративной программатнень важодеманть лувсо. Башка мель явови специальной военной операциянь участниктнень профосмотратненень.
Мордовия Республикань Прявтонь Пресс-службась