«Конституциясонть путозь минек эрямонь юрось, те минек паро эрямонь ды виевгавтомань гарант, сон топавты политической, экономической ды военной безопасностенть, - тешкстызе Артём Здунов. - Минек Президентэнть лезксэнзэ вельде минь тейтяно од предприятият, вадрялгавттано оштнень ды поселкатнень. Эряви путомс ярмакт медицинантень, образованиянтень, культурантень ды спортонтень, секс мекс весе те лезды ванстомс ломантнень, ламолгавтомс чачтоматнень ды кувалгавтомс эрямонть».
Истят питнейчитне, кода Тиринь масторонтень кемевиксчись, раськетнень ютксо чарькодемась, тиринь модантень лезэнь кандомань бажамось, эрявикст весе шкатнестэ. Самай секскак масторонь Президентэсь яволявтызе сы иенть Россиянь раськетнень вейсэндявомань иекс.
Мордовиянь Прявтось ёвтась сюкпря минек боецтнэнень, седе пек сеттненень, кить ней передовойсэть. Государственной зярыя покш казнеть максозельть куломадо мейле. Маштовозетнень ледстизь чатьмонемань минутасо.
Казнеть максозь Отечествань ламот ванстыцятненень. Артём Здунов явшесь Мужествань ордент Саранскойстэ Андрей Макеевнень ды Александр Силантьевнень. Кавонест геройтне тердезельть церемониянтень малавиксэст марто. Андрей Макеев Кристина нинзэ марто кастыть колмо эйкакшт: покш цёрантень вете иеть, вишка тейтерентень - 9 ковт. Ды сехте прявтось, кода кортыть мирдть-нить, - те вейке-вейкеде мелявтомась.
Александр ды Екатерина Силантьевтнень кавто эйкакшост - сынь уш школасо тонавтницят. «Кирдтяно каштанчи эсь тетянок кувалма, секс мекс сон Тиринь масторонь ванстыця», - мерсть Оля ды Дима Силантьевтне.
Кенярксчинь промкссонть ютавтовсь эште вейке прявт церемония - кемнилее иесэ школасо тонавтницятненень паспорттнэнь явшемась. Республикань Кудонтень тердезельть од ломантне, конат сайсть цетавкст тонавтнемасо ды спортсо. Республикань Прявтось ёвтась тенст поздоровт прявт документэнь получамонть кувалма. «Покш честь получамс паспортт Ине Изнямонь 80 иетнень топодемань иестэнть, - мерсь сон. - Ули мелем: тынь кирдевлинк мельсэ те чинть. Ды штобу Изнямонь 100 иетнень тынь тешкставлинк эсенк эйкакшонк марто. Те тешксты сень: минек государствась карми эрямо, карми ванстомо геройтнень».
Республикань эрицятненень казнеть истя жо явшесть МР-нь Государственной Собраниянь Председателесь Владимир Чибиркин ды МР-нь Правительствань Председателесь Батыр Эмеев.
Мордовия Республикань Прявтонь Пресс-службась