Советэсь коень коряс ютавтови иенть прядовомсто, максови питне виевгавтомань национальной тевтнень топавтоманть коряс важодемантень - тей пурнавсть властень весе уровнятне, деловой ды научной кругтне, виевгавтомань институттнэ, общественной организациятне.
Национальной проекттнэ аштить национальной тевтнень топавтомань прявт инструментэкс. «Сынст цела форматонь нолдамонть туртов теезель нормативной база, тешкстазельть финансированиянь источникть, ладязь цетавкстнэнь цифровой мониторинг, конась нежеди эрицятнень, бизнесэнть, профессиональной сообществатнень питнест максоманть лангс, социологической кевкстнематнень мельсэ кирдезь, конат ветявить свал, эрьва кварталсто. 19 национальной проекттнэ ушодовсть ды целанек вадрясто», - тешкстызе Владимир Путин.
Те иентень нежедькстнэнь прявт пельксэсь топавтозь. Истя жо топавтозь аравтлутне каладозь кудотнестэ одс эрицятнень ютавтоманть коряс. Касы агропромышленной производствась, ламолгадыть креативной индустриятне. Топавтозь прогресс уштомань-энергетической секторсонть, «мирной атомонь» енкссонть отечественной технологиятнень виевгавтомасонть. Вадря лувсо касы-кепети отходтнэнь марто важодемань индустриясь ды пекстазь циклань экономикань кемекстамось. Кассть ломантнень вадря питнень максомаст истят енкстнэсэ, кода китнень «ежось», внутренней туризманть туртов условиятне, истя жо средней профессиональной ды высшей образованиянь вадрячись, государственной услугатнень электронной лувсо явомась. Кассь вадрялгавтомань-мазылгавтомань уровнянтень вадря питнень максомась.
Аволь истя неявить полавтоматне жилищно-коммунальной ёнкссонть, пирявтомо средань теемасонть. Президентэсь кармавтсь Правительствантень регионтнэнь марто вейсэ эрязкавтомс нежедиця эрямонь пунктнэнь виевгавтомань Комплексной программань анокстамонть ды кемекстамс сонзэ нурька шканть перть.
Покш мель явозель демографиянтень. Ледстясынек, Правительствась кемекстызе те ёнксонть коряс тевдеемань кувака шкань Стратегиянть, нолдась «Семья» национальной од проект. Те иестэнть саезь чачомань невтевксэсь совавтозь Федерациянь субъекттнэнь прявттнэнь важодемантень питнень максомантень.
«Арсеви нолдамс тевс эйкакш марто семиятненень лездамонь од енкст. Истя жо семиянь пандомась, конань 2026 иестэнть саезь кармить получамо аволь покш доход марто семиятне, косо касыть кавто ды седе ламо эйкакшт, - мерсь государствань прявтось. - Тедеде тевс нолдазь корпоративной демографической стандартось. Сон лезды виевгавтомс бизнесэнь улеманть демографиянь тевтнень топавтомасо. Истя, сы иень якшамковонь 1-це чистэнть саезь касы суммась, конань важодемань таркань максыцянтень мереви пандомс важодицятненень эйкакшонть чачтомсто ды конастонть а карми пандовомо НДФЛ ды страховой пандомат. Те карми вейке миллион целковойтнень видьс. Икеле истямо пандомась ульнесь 50 тёжас. Энялдан минек компаниятненень эрязасто нолдамс тевс неть возможносттнень, топавтомс социальной ответственностень лувтнень».
Текень пингстэ зярс эштё демографиянь виевгавтомань коряс тевтне а сатыть. Ризксэнтень, берянь лувось ванстови: чачтоматне поладыть киртявомо. «Чарькодеви, улить алкуксонь тувталт, мекс тевтне молить истя, масторлангонь демографиянь тенденциятнень, ды истя жо ХХ пингень куншкавидьстэ ды прядовомсто минек демографиянь аволь вадря толкунтнэнь одс путоманть мельсэ кирдезь, конатне течи одс максыть содамс эсь прядост. Нама, демографиянть лангс теить путовкс внешней тердематне, - мерсь Владимир Путин. - Теке марто тагояк тешкстаса: минек историянь кувака шкань тевесь сюлмавозь минек раськень ванстоманть ды ламолгавтоманть марто. Ды, молиця тевтнень лангс, стакачитнень лангс апак вано, миненек эряви кирдемс те нежедьксэнть. Чачтоматнень ламолгадомась, эйкакш марто семиятненень лездамось, ломантнень шумбра эрямост кувалгавтомась – весе те минек тынк марто вейсэнь вийтнень прявт ёнкстнэ».
Весе масторонть келес чачтомань киртямонь лувонть полавтомга, Президентэсь кармавтсь виевгавтомс важодиця тевтнень весе уровнятнесэ. Федерациянь зярыя субъекттнэ невтить, кода тень мереви вадрясто топавтомс. Те иень сундерьковонь 1-це чистэнть саезь аравтлувонь невтевкстнэнь коряс эли седе верев лиссть Россиянь Федерациянь 18 регионт, колмоце ды седе меельце эйкакштнень чачомаст коряс - 11 регионт.
Текень пингстэ Владимир Путин явсь башка мель: целанек масторонть келес вадрялгадсь эйкакштнень чачтомантень анокчинтень питнень максомань социологической невтевксэсь. Сехте виевстэ – Херсонской ды Запорожской областтнесэ, Мордовия, Алтай, Кабардино-Балкария республикатнесэ.
«Лован эрявиксэкс ванномс лездамонь демографиянь тевтнень, конат важодить регионтнэсэ, кочкамс юткстост сехте вадрятнень ды, шкань апак таргсе, ламолгавтомс общенациональной уровнясонть. Тень коряс энялдан Правительстванть ды Федерациятнень субъекттнэсэ коллегатнень одкстомтомс чачтоматнень ламолгавтомань региононь программатнень. Правительствантень эряви анокстамс весемеендонь решеният демографиянь аволь вадря лувонь полавтоманть туртов. Те системань васенце тев, конась ашти Правительстванть ды регионтнэнь икеле 2026 иентень национальной проекттнэнь ды целанек государственной политикань топавтоманть коряс», - мерсь Президентэсь.
Мордовия Республикань Прявтонь Пресс-службась
Фотось: Kremlin. ru