20 ноябрьста Мордовия Республикань Оцюнять мзярошка пингс тевонзон тиендисна Артем Здунов ульсь Саранскяйса асу шабатнень ширеснон кирнеманц коряс «Мира» центраса, коса корхнесь педагокнень мархта и казезень «Большая перемена» школьниконди Всероссийскяй конкурсонь сяськихнень Агнесса Куприяновать и Татьяна Баковать.
Лятфтасаськ, асу шабатнень ширеснон кирнеманц коряс «Мира» центрась панчфоль 2019 кизоня Россиянь Президентть Владимир Путинонь мархта азф «Образование» национальнай проектть эряфс етафтоманц мяльса кирдезь. Центрась работай колма направленияс коре: «Искусство», «Наука» и «Спорт», сонь фкя инь васенце задачац – водендамс асу шабатнень проектнай и исследовательскяй тевти.
Мордовия Республикань Оцюнять мзярошка пингс тевонзон тиендисна Артем Здунов мяль вельде ванозень Центрать сембе площадканзон, а эздост тяса пяк лама: тя искусственнай интеллектонь и инженернай сетень, агробиотехнологиянь, цифровой производствань и дизайнань, физическяй исследованиянь и астрономиянь лабораториятне, литературнай и театральнай творчествань, национальнай культурань студиятне. Улихть шахматнай зона, эряфонь шумбра коень лаборатория, панжада тренажернай площадка, спортзал, стадион и нльне планетарий. Мордовиянь вятись корхнесь Центрань педагокнень мархта, кизефнемок синь шабатнень мархта работать колга, проектнай и исследовательскяй тефнень направленияснон квалма.
«Мира» центраса Артем Здунов васетькшнесь «Большая перемена» школьниконди Всероссийскяй конкурсонь сяськихнень – Саранскяень 12№ гимназиянь 11 классонь тонафнить Агнесса Куприяновать и 35№ школань 10 классонь тонафнить Татьяна Баковать мархта. Лятфтасаськ, конкурссь нолдаф тевс Россиянь Президентть Владимир Путинонь мяленц коряс, сонь целец – максомс возможность любой шабати няфтемс прянц и мумс эсь вии ширензон. Мордовиянь школьникне примасть активнай участия конкурсса.
«Мон ваныне – Мордовиясь кучсь 4,5 тежянь участник – тя пяк лама. 42 полуфиналист, 5 финалистт – тя пяк цебярь результат! – мярьгсь Артем Здунов. – Лувондса, што республикаса тейнек эряви шарфнемс башка оцю мяль од ломаттнень виияфнемаснонды. Ули кой-кодама прябала, и аф аньцек Мордовияса, - тушендыхть ломаттне региоттнень эзда. Сяс минь путнетяма инголенк задача тиемс сембе условиятнень личностнай касомать инкса: тя и рабочай вастт должетт улемс, и достойнай занятость, и од ломаттнень виияфнемаснон коряс тяфтама центрат».
Мордовиянь Оцюнясь кода Россиянь Президентть кадровай резерванц выпускникоц азозе, што шарьхкотькшнесы, конашкава стакаль и ответственнаель конкурсанттненди кись сяськомати, мзяра аф теждя задача теест савсь решандамс.
«Тейне оцю честь содафтомс мархтонтт!» - мярьгсь Артем Здунов победительницатнень каземста. Агнесса Куприяновати и Татьяна Баковати максфтольхть благодарственнай сермат и 10 тежянь цалковаенди сертификатт. Стане жа благодарственнай сермат максфтольхть школьницатнень наставникснонды и тядяснонды-аляснонды.
«Мира» центраса улемста Мордовиянь Оцюнять мзярошка пингс тевонзон тиендисна стане жа ванозе образовательнай учреждениять маласта территориять, тяконь лувксса теенза няфтьфтольхть теплицатне, конатнень ладязь сянкса, штоба шабатне тонафнелезь тяниень пингонь агротехнологиятнень.
Мордовия Республикань Оцюнять пресс-службац