Мордовия Республикань Оцюнять мзярошка пингс тевонзон тиендисна Артем Здунов 19 ноябрьста етафтсь коронавирусть каршес тюремать мархта сотф кизефкснень коряс совещания. Мордовиянь вятись макссь поручения анокламс инфекциять келемоманцты каршек ащеманкса од мерат. Сембода эффективнайхне еткстост вановихть оперативнай штабть заседаниянц пингста, кона кармай маластонь пингть.
«Тячи мялезе кулхцондомс специалисттнень мяльснон-арьсемаснон сянь коряс, кода ащихть тефне афкукс, - мярьгсь Артем Здунов. – Ушедсаськ Роспотребнадзорть статистиканц эзда, кулхцондсаськ Минздравть – кода коронавирусть лангс путневихть лия респираторнай урматне. Койка-васттнень колга корхтатама – кодама коечнай фондсь, кодамот запасне. Работай ялгат, азондость любой мялентень-арьсемантень, эрьда корхтатама тянь колга рабочай режимса. Лекарственнай препараттнень колга обязательна – улихть-аш, мезе тиендеви, кода серматкшневихть рецепттне, кода синь обеспечендакшневихть, кодамот минь резерваньке. И, конешна, кода карьхцявихть ся средстватне, конат нолявихть тейнек, кода синь пачфневихть ломаттненди».
Совещаниять пингста Мордовия Республикань Оцюнять мзярошка пингс тевонзон тиендисна ванозень пцтай сембе кизефкснень, конат сотфт регионца ковидть каршес тюремать мархта. Тяфта, корхтамась мольфтевсь лекарственнай обеспечениять колга – стационархнень эса и амбулаторнай секторса, улихть-аш медикаментт аптечнай сетьса кудса пчксеманкса. Ломаттнень лекарственнай препаратса обеспечендамаснон коряс кизефксть Артем Здунов азозе инь васенцекс. Максф поручения сяда отькорьста водендакшнемс аптекатнень эса эрявикс препараттнень улемаснон мархта ситуациять мониторингонцты волонтерхнень.
Стане жа корхтафоль ковиднай госпитальхнень эса сатомшка койка-вастонь панчсемать колга. Артем Здунов мярьгсь, кле, кда эрявксты, эряви ваномс-арьсемс курокста строяви госпитальть строяманц коряс возможностсь. Апак заняк лядонды койка-васттнень улемасна азф тяниень пингть фкя инь важнайкс. «Тейнек эряви улемс анококс любой событиятненди», - китькстазе республикань Оцюнять мзярошка пингс тевонзон тиендисна.
Заседаниять шумордамста Артем Здунов макссь поручения анокламс коронавируснай инфекциять келемоманц каршес ащеманкса од мерат, меле синь вановихть оперативнай штабть заседаниясонза, кона кармай малстонь пингть.
Мордовия Республикань Оцюнять пресс-службац