20 ноябрьста Мордовия Республикань Оцюнять мзярошка пингс тевонзон тиендисна Артем Здунов етафтсь национальнай проекттнень эряфс етафтомаснон коряс рабочай совещания. Региононь вятись мярьгсь, што тянкса нолдаф средстватнень карьхцямасна кармай кирдевома кеме контроль ала, а нацпроекттнень эряфс етафтомста фкя инь васенце задачакс азозе од высокопроизводительнай рабочай васттнень панчсемаснон. Тякось жа кармай сявондевома мяльс отраслевой министрхнень работаснонды оценкань максомста.
Совещаниясь, коса примасть участия Правительствань члеттне, етась видеоконференциянь режимса. Министерствань вятихне пачфтсть национальнай проекттнень целевой показательснон пяшкотькшнемаснон колга.
Республикань Оцюнять мзярошка пингс тевонзон тиендисна китькстазе, што пандемиянь условияса именна нацпроекттне лезнихть виияфнемс экономикать, ащихть хозяйствующай субъекттнень ширеснон кирдеманкса важнай механизмакс, а стане жа макссихть панчсемс од рабочай вастт – республикаса занятостть мархта аф инь цебярь обстановкать мяльса кирдезь региональнай министрхненди эряви сявомс тя кизефксть башка контроль алу.
«Сай пингонди – эрь министрти ( нльне эста, кда строявихть социальнай объектт) эряви шарьхкотькшнемс: тоса фалу должетт панчсевомс рабочай вастт. Занятостть мархта кизефкссь – фкя инь оржась республикаса, сяс эряви тиемс рабочай васттнень панчсемаснон коряс министерстватнень эзга внутренняй план. Башка мяль – экономическяй блокти, велень хозяйствань и промышленностень министерствати. Кда минь мезе-бди строятама – миньцонк должетт эвондакшнемс од рабочай вастт», - мярьгсь Артем Здунов.
Стане жа, башка мяль Мордовиянь Оцюнять мзярошка пингс тевонзон тиендисна шарфтсь объекттненди, конатнень коряс ули лядондома строямань графикть эзда, китькстазе, што сембе целевой показательхнень пяшкотькшнемасна кармай кирдевома кеме контроль ала. «Нацпроекттне водендафт эрь ломанть эряфонц цебярьгофнеманкса, - мярьгсь Мордовиянь вятись. – Аш кода юкснемс, што минь работатама ломаттненди, республикань эряйхненди. Сяс минь карматама ванома тянкса нолдаф средстватнень карьхцямаснон мельге. Ярмакне, конатнень нолясыне федеральнай бюджетсь, эрявихть карьхцямс регионца эряфть качестванц цебярьгофнеманкса».
Кода китькстазе республикань вятись, нацпроекттнень мяльса кирдезь строяви объекттнень строямань графиксна эряви ванондомс эрь недяляня, объекттнень тевс сувафтомаса графикта лядондомать нолдамс аш кода.
Мордовия Республикань Оцюнять пресс-службац