«Кенярьдян шумбракстомс тинь инжиень кельги мокшэрзянь модать лангса, - пшкядсь Артем Здунов Ассирийскяй церкавть представителензонды. – Тейнек оцю честь, мес ширьнек Святейшай Московскяй Патриархть благословениянц коряс ётафтови тяфтама мероприятия».
Республикать ули народъётконь взаимодействиянь оцю опытоц. Мекольце мероприятиятнень эзда фкясь – Христианскяй межконфессиональнай консультативнай комитетсь «Христианская молодежь в медийном пространстве» темать лангс. Сон ётнесь Саранскяйса внешнецерковнай сотксонь Синодальнай отделть эгиданц ала.
РПЦ-ть и Востоконь Ассирийскяй церкавть ёткса диалогонь коряс Комиссиясь покоди уже кемонь кизот. Сонь покодемац тиф нравственнай питнишитнень, духовнай касфтомать и од ломанень образованиять ванфтомаснон лангс.
Артем Здунов лятфтазе, што минь странасонк Президентть Владимир Путинонь указонц мархта кемокстафт традиционнай россиянь духовна-нравственнай питнишитнень ванфтомаснон и кемокстамаснон коряс государственнай политикать основанза.
«Рузонь православнай церькавть и Востоконь Ассирийскяй церькавть ёткса диалогть коряс Комиссиять покодемац – минь анокшинеконь няфтемац межконфессиональнай и межэтническяй взаимодействиять каршес», - мярьгсь Саранскяй и Мордовскяй Митрополитсь Зиновий.
Комиссиять сопредседателец Краснослободскяй и Темниковскяй епископсь Климент мярьгсь, што пцтай покодемань кемонь кизоста ладяф пяк цебярь сотрудничества.
Комиссинь сопредседательсь Багдадскяй епископсь Мар Элиа Тимрссь сюконясь республикань Оцюняти примаманкса и таколфты тема лангс корхтаманкса возможность инкса, ладяф взаимодействиянь и сотксонь кемокстаманкса. «Минь фалу ащеме Рузонь православнай церкавть ваксса, - китькстазе сон. – И тяни минь марясайнек прянеконь стане, бта эрятама фкя кудса, што минь – фкя семьятама. Минь мархтонтт фкя лаца позициянеке семьянь и ръвакс тумань-ръвяямань кизефкснень, традиционнай питнишитнень коряс».
Комиссиясь кармай покодема республикаса колма шит. Ассирийскяй церкавонь представительхне арьсихть ваномс духовнай семинариять, «Защитники Отечества» Фондтть региональнай филиалонц, религиознай учреждениятнень, содамс регионтть опытонц мархта од ломанень политикань сфераса.
Лятфтасаськ, Саранскяйсь - тя Поволжьянь православнай од ломанень столицась. Патриарх Кириллть благословениянц коряс тяса эрязста покоди РПЦ-нь од ломанень служениянь Синодальнай отделть Координационнай центрац.
Васедемаса примасть участия Мордовиянь Правительствать Председателец Дмитрий Поздняков, васенце вице-премьерсь Галина Лотванова, Рузонь православнай церкавть и Востоконь Ассирийскяй церкавть еткса диалогть коряс Комиссияв сувайхне.
Мордовия Республикань Оцюнять пресс-службац