«Тя илась уже арась общенароднайкс, - китькстазе республикань руководительсь. - Аньцек тячи шобдавакиге мон лична получань тъняра ролик! Тиендсазь синь, сяда сидеста, од ломаттне, и тя пяк кенярьфти. Тъняра открытка и поздравления аф ашкодови Шачема Масторнеконь сембе пестонза! Конешна же, тя илать мархта эряви обязательно илафтомс минь боеценьконь - сятнень, кие тяни специальнай военнай операцияса. Пожалуйста, тиесть тянь – минь лемнеконь эзда,монь лемозень эзда. Теест тя пяк эряви – получандамс тя сёрманять».
Артем Здунов башка китькстазе: дружнай, кеме, ламапоколеннай семьятне кочксесазь минь государстванеконь вандыень шинц, синь эсост великай Россиять панжемань виец. «Аф стак Российскяй Федерациянь Президентсь лемдезе тя кизоть семьянь Кизокс. Минь республикаса поладоськ сонь Трудовой династиянь Кизонь иласа. Кода няеви, династиядонк минь пяк лама».
Республикаса кассь лама идь мархта семьянь лувкссь - колма кизоста 10%. «А къда ваномс 10 кизот – синь эздост арась пцтай кафксть сяда лама. Минь ушеткшнетяма этафнема эряфс шачиень лувксонь касомать и идь мархта семьятнень кирдемаснон коряс программать. Минь нолдатама муниципальнай районнеконь эзда фкять эса пилотнай проект. Карматама покодема работодательхнень, сембе общественнай институттнень, врачнень, штоба шарфтомс од семьятнень ванфснон сянь лангс, кода ванфтомс аф аньцек эсь шумбрашиснон, но и кармай идьснон шумбрашиснон. Семьянь кизось сявсь ушеткс Президентть указонц эзда, конац токсесы лама идь мархта семьятнень статузснон касфтомаснон и социальнай кирдемаснон. Минь ширнек указть положениянзон алу повсть 40 тёжянь республикань эряй. Сюконян сембе семьятненди, конат достойна касфтыхть идтть. Башка сюконяма валхт сятненди, кит ваныхть тядяфтома-аляфтома иттнень мельге. Тя тядят и алят оцю седи мархта. Мода ваксс прянь нолдама!»
Лама идь мархта тядятнень-алятнень тяфта жа илафтозь республикань Госсобраниянь Председательсь Владимир Чибиркин и РФ-нь сенаторсь Петр Тултаев.
Торжественнай мероприятиясь лиссь пяк лямбе и мялень салай. Илякс ашель кода улемска - въдь лама идь мархта тядятне-алятне содасазь сембода лац, конашкава эрявихть эряфса заботась, вниманиясь, уважениясь, седи ваксста моли участиясь.
Семьянь павазонь секретонц колга азондсь Дмитрий Кокорев Чамзинскяй районцта – ръванц мархта синь касфтыхть вете идтть. «Минь лац содасаськ: къда семьяса ули шарьхкодема, кирдема и кельгома, то пелемс аш мезьда», - мярьгсь сон. Кокоревне лия семьятнень мархта рядс ульсть казьфт «За заслуги в воспитании детей» Мордовия Республикань Оцюнять Почётнай дипломонц мархта.
Мордовия Республикань Оцюнять пресс-службац