«Региону мон сашендонь кизонда, эста Саранскяйса ульсь BMX - велосипеднай спортть коряс Россиянь Первенствась и Чемпионатсь «гонки» дисциплинаса. Прявкс национальнай стартть ётафтозь Россияса инь од олимпийскяй уровенень «Суперкросс» трассать лангса. Корхнень содаф спортсметтнень и касы сменать макфта. Тячи Мордовиясь стаки виензафнесы спортть и ащи шумбра эрямань образть инкса», - китькстазе Михаила Дегтярёва.
Артём Здунов азондозе, што «Спорт – норма жизни» проектть целевой показателенза, кона появась Президентть мяленц коряс, 2024 кизоти сатфт, а кой-кона пункттнень коряс сяда оцюфт. Пцтай 56 % Мордовиянь эряй кемоста кирдихть ялгань соткст физическяй культурать и спортть мархта.И тяфтама ломанень лувкссь фалу касы. Ульсь китькстаф, што, васендакиге, тя лезды регионца виензаф спортивнай и рекреационнай инфраструктурать улеманцты (республикаса тяни 2 тежяньда лама тяфтама сооружения, пялесна тифт ломаттнень лемс шумбрашинь особенность мархта).
Мекольце кизотнень Мордовияса тиф мзярошка оцю спортивнай объект, синь ётксост панжада ВМХ-трексь (суперкроссань трассась), кафта уровенень фристайл-парксь, Огарев Аренань универсальнай залсь. Спортивнай сооружениятне панчсевихть и районга – кепотьксонди, кафта бассейнат Ардатовса и Атяшеваса, вельхтяф эень катоксь Ковылкинаса, в д. Краснослободскяй райононь Бобылевскяй Выселки велеса многофункциональнай спортивнай комплекссь, тиендевихть вастт ГТО-нь нормань кирдеманди.
Артём Здунов и Михаил Дегтярёв корхтасть бороцяманди залонь строительствать колга Рузаевкаса и Саранскяйса, а тяфта жа объектонь сувафтомать колга «Развитие физической культуры и спорта» госпрограммати. Бороцяйхнень лемс инфраструктурань одкстоптомась арьсеви ётафтомс государственно-частнай партнерствать видеса. Тяфта жа корхтамась мольсь «Термоленд – Саранск» семьянь физкультурно-оздоровительнай комплексть строяманц колга, Зубово-Полянскяй районца и Саранскяйса модульнай спортивнай сооружениянь путомать колга.
Мордовиясь сувась 12 странань субъекттнень ёткс, конатнень РФ-нь Минспортсь кочказень ёмластокиге идтнень эряфс физическяй виензамать сувафтоманц. Регионтть руководителец пачфтсь, што кизоть пес «Ты – Чемпион!» ёмла идень физическяй виензамань Центрась панжеви «Старт» республиканскяй спортивно-тренировочнай центрать базаса. Михаил Дегтярёв китькстазе, што тя шачфтыхнень лемс эсь лацонь возможность прважамс эсь идьснон ся спортонь видтти, конанцти сонь ули мялец и виенза.
Россиянь спортонь Министрсь пшкядсь республикань руководительти эняльдема мархта шарфтомс мяль «Плавание для всех» проектть лангс и тердемс сяда лама идь сонь эзонза. А тяфта жа шарфтомс мяль школьнай спортть виензаманц лангс, кепотьксонди школьнай спортивнай лигань тиемать коряс.
Эрявикс ширесь – идень спортти коммерциализациять аф нолдамац. Федеральнай ведомствань руководительсь китькстазе, што сембе субъектонь оцюнятненди эряви мольфтемс тя сферать эса тевонь вятемать коряс мониторинг.
Мекольце кизотнень Мордовиясь фалу арси оцю сембероссиянь и народъетконь пялькстомань ётафтома вастокс. Кепотьксонди, сай кизоть августста врачень Ассоциациять-футболонь кельгихнень мархта марс Мордовияса арьсеви здравоохранениянь отрасляса покодихнень ёткса футбольнай турниронь ётафтомась. Участникокс арайхть Россиянь субъекттнень и ялгакс тии странатнень эзда медикне.
Мордовия Республикань Оцюнять пресс-службац