Административнай судопроизводствань порядкаса ванф 26 тёжяньда лама тев и материал, решеният лихтьфт 25,6 тёжянь тевть коряс, ёткстост — пцтай 25 тёжянть коряс вешфксне пяшкотьфт. Сембоц пяшкотьф вешфкснень коряс суммась арась 200 миллионда лама цалковай, государствать доходс пошлинась арась 10 миллионда лама цалковай.
Судебнай оргаттнень мархта ванф 3320 уголовнай тев и 21,5-да лама материал. 2021 кизоть коряс производствать мархта шумордаф уголовнай тефнень лувкссна кирсь 10,9 процентта. Муворгофты приговорхт лихтьфт 2867 лицать каршес, оправдательнай приговорхт — 12 лицать каршес.
Васедемать пингста стане жа корхтамась мольфтевсь мировой судьянь участкатненди вастонь максомать и работаснон цебярьгофнеманц колга. 2022 кизоня ётафтф оцю работа мировой судьятнень судебнай помещенияснон обеспечендамаснон коряс. Комсь киза мировой судьятнень ашельхть эсь помещениясна.
Ётай кизоня работань условиясна цебярьгофтфт Атяшевскяй, Ичалковскяй, Ковылкинскяй и Чамзинскяй райоттнень эса. Республиканскяй бюджетста тянкса нолдафоль 110 миллион цалковай. Лятфтасаськ, што Госсобранияти Посланиянц эса Мордовиянь Оцюнясь путсь Правительствать инголе задача тиемс тянь лаца условият Краснослободскяй, Рузаевскяй и Саранск ошень Октябрьскяй райононь судебнай участкань мировой судьятненди, а стане жа тиемс капитальнай ремонт зданияти, коса ащихть Лямбирскяй райононь мировой судьятне.
Мордовия Республикань Оцюнять пресс-службац