Саранскяень эряйсь Галина Учаева – васенце группань инвалидсь, шашни коляска вельде. Уже лама киза кирди соткст спортть мархта, и пяк лац: Галина Николаевна - международнай классонь спортонь мастер, ламонь кърда странань чемпионатонь, Европань и масторонь призер пара-армрестлингть коряс. Тя кизоть сон арась Россиянь чемпионатонь сяськикс. Галина Николаевна пичеди маломобильнайхнень инкса - сембонди, кинди эряви социальнай транспорт шашнеманди. Тяниень пингть тяфтама населениянь группатненди шашнеманди улихть колма «Газель» маркань автомобильхть.Индивидуальнай перевозкатнень коряс услугатне макссевихть питнефтома. Заявкать транспортть лангс ули кода максомс гайфтезь МП «Горэлектротранс» Саранск с.о. диспетчерти.
«Но машинатне уже сирет, сидеста синневихть. Эняльдян инвалидтнень и идтнень-инвалидтнень шачфтыснон эзда, штоба тинь эвондаль возможностенте мумс ярмак од транспортонь рамамс», - мярьгсь Галина Учаева.
Ошень чиновникне прябалати шаштсть нолдаф ожат – эняльдематнень каршес прважасть отпискат, тяфтама ответонь максыхнень мархта республикань Оцюнясь мярьгсь корхтамс. «Од автотранспортсь, конешна, эряви. Рамасаськ сонь, сувафтомок тевс эрь кодама финансированиянь источникнень», - мярьгсь Артём Здунов.
Соответствующай поручения максф пингс путф Саранск ошень округть оцюнянцты Владимир Быковонди. Прябалать пяшкодеманцты шаштыхть сембе ширде - «Горэлектротрансонь» одкстоптомань программать коряс, республиканскяй бюджетса кармай максф ярмак эрькизонь закупкать лангс допдоходтнень эзда, «Единая Россиясь» вешы партийнай средстват. Спецтранспортсь эряви и боецнендивок, конат мрдасть СВО-ста и ётнихть реабилитация, синь ётксост - спортзалса. Решениясь - правительствань социальнай блокть и «Защитники Отечества». СВО-нь участниконь кирдемань Государственнай фондть филлиалонц мельге.
Тяфта жа Галина Учаева пшкядсь личнай эняльдеманц мархта: лездомс теенза якамс «Вымпел» спортклубу тренировкас аф кафксть недяляти, кода тяни, а колмоксть. Тя лезды параспортсменкати пяшксе вийхть анокламс пялькстоматненди и аралакшемс родной регионтть и сембе странать честенц. Республикань Оцюнясь макссь поручения МР-нь Правительствань Председательть васенце полафтыенцты Галина Лотванованди сявомс кизефксть контрольс.
Артем Здунов и Василий Пискарев арьсесть авати шумбраши и од спортивнай сяськомат. «Тон пяк достойнай ломанят, чемпионат. Сюкпря сатфксонкса», - мярьгсь Мордовиянь Оцюнясь.
«Бессмертный полк России» общероссийскяй общественнай гражданско-патриотическяй движениять МР-ть коряс региональнай отделениянь Штабть руководителец Евгений Ячинов сась приемс кизефкс мархта, конац токсесы Саранскяйса 1941-1945 кизонь военнай и трудовой подвигонь Мемориальнай музейть петеманц. Музейсь ульсь панчф 1995 кизоня, сон – од поколениянь духовно-нравственнай, патриотическяй касфтомань важнай центра.
«Тяса пяк цебярьхть экспозициятне, но петема зданияса ашель. Ломаттнень, конат ваныхть патриотическяй покодемать мельге, тя кизефкссь пичефтьсыне. Сай кизось республикаса лемтьф историческяй мялямонь Кизокс. Сянкса улель ба пара шарьхкодемс, кармай ли музейть одкстоптомац и мзярда. Сяс мес тяниень пингть музеень фондтнень сохранностьснон инкса улихть оцю пичефкст», - китькстазе сон.
Кода мярьгсь МР-нь культурань министрсь Светлана Баулина, музейть капремонтонц ушедсазь сай кизоть од нацпроектть видеса. Арьсеви сембе инженернай коммуникациятнень, кровлять одкстоптомац, а тяфта жа пяшкодемс культурань объектть тяниень пингонь оборудованияса.
Темниковскяй районцта приемс сась Мария Баранчикова, Бабеевскяй сельскяй поселениянь оцюнять полафтыец. Сон эняльдсь Ивановка велеть газификациянц коряс. Велесь аф оцю, тяса эряйхть пенсионерхт, но тяни кудтнень эрязста рамсесазь дачникне. Кода китькстазе Темниковскяй райононь Оцюнясь Олег Родайкин, тя территориясь арьсеви виензафнемс туризмать ширде.
«Газпром межрегионгаз Саранск» ООО-ть генеральнай директороц Владислав Портнов пачфтсь, што велесь сувафтф газификациянь программати 2025 кизос, межпоселковай газопроводть кувалмоц кармай 1,7 вайгяльбе, внутрипоселковай газопроводть - 700 метра.
Мордовия Республикань Оцюнять пресс-службац