Тячи сыродельнай комбинатсь – тя сембероссиянь уровенень агропромышленнай гигант, конань эса виензакшни мзярошка производствань шире. Эрь шиня тяса ноляви 40 тоннада лама продукция –эрь кодама сыронь и ваень видт, сембоц пцтай 75 наименования. «Зърнянь сексе» выставкаса тя кизоть комбинатсь сявсь вете зънянь медальхть, продукциясь, кода фалу, получась экспертонь и варжаень инь цебярь оценкат.
«Тинь продукциянттень содасазь сембе странать коряс. Сонь кельгсы и монь семьязе, монь идне. Арьсян предприятияти касомас и виензакшнемс сяда тов, штоба заводу покодема сашендольхть од ломатть, штоба появакшнельхть од трудовой династият», - мярьгсь Артём Здунов.
Предприятиясь сувси Россиянь сырань и ваень вяти нолдайхнень ёткс. Эрь кизоня комбинатсь ноляй тевс 350 тонна лофца. Мекольце вете кизотнень производствань одкстоптомати сувафтф 0,5 млрд цалковайть малава. 2020 кизоня строяф од производственнай лаборатория. 2022 кизоня предприятиясь нолдась од цех шяняфьф сыронь нолдамать коряс. 2024 кизоня ушедсь од цехонь строительствась 400 тонна лофца суткати мощность мархта.
Заводть генеральнай директороц Николай Киреев эсь эздонза и сембе коллективть эзда сюконясь Республикань Оцюняти предприятиять покодеманцты оцю оценкань максоманкса и сембе ушеткснень эса кирдеманкса. «Минь покодтяма «Натуральность и качество» девизть ала, кемоста ащетяма пильге лангса и уверенна ваттама вандыень шити», - мярьгсь сон.
Комбинатть коллективонц станя жа илафтозь республикань Госсобраниянь Председательсь Владимир Чибиркин, МР-нь Правительствать Председателенц полафтыец Раиса Цыбизова, Ичалковскяй райононь оцюнясь Валентина Дмитриева, В.М. Горбатовонь лемса Сембероссиянь ваень и сыронь тиемань научно-исследовательскяй институтть ярхцамбялень системань Федеральнай научнай центрать филлиалонц Углич ошса директороц. Григорий Рогов и лия тердьф инжихне. Предприятиянь покодихненди ульсть максфт наградат.
Мордовия Республикань Оцюнять пресс-службац