Тяса и шуфтонь тавлань налхкшсь, и традиционнай мокшэрзянь сёрматфсь, конац содаф сембе Россияса и национальнай мазоптомань бисероплетениясь, и художественнай керамикась. Ламоц маштосама козя мокшэзрянь народсь – тя и валенцянь кевордамась, и теньгушевскяй семицветкань эсь лацонь орнаментонь кодамась, и шуфтста кудонь паршиень, боцькянь тиемась. Сембе ня маштоматнень мастерхне мяляфтсазь, ванфтсазь и анокт максомс од поколенияти.
«Шумбратсь» - тя ялгакс и весялашинь ила, конац марстопнесы мокшэрзянь народтть, сонь культуранц и историянц. Инь мазы илань событиятнень эзда фкясь – Мордовиянь национальнай коллективнень и Москувонь Мокшэрзянь землячествань коллективнень театрализованнай шествиясна-хороводсь. Сонь эсонза примасть участия сембе илань инжихненди.
«Все мы – Россия!» Колоритнай театрализованнай представления-прологта меле участникнень и инжихнень шумбракстозень Мордовиянь Оцюнясь Артём Здунов.
«Мордовиясь - великай Россиянь пялькс! Тага весть минь ётафттама Москвуса тяфтама оцю ила – оцю «Шумбрат». Шумбрат, Москву! Шумбрат, Россия! – мярьгсь Мордовиянь Оцюнясь. – Минь тяряфнеме няфтемс промысланеконь, театральнай шоут, няфтемс, кодама минь ширнек ули национальнай модань театра. Мялезе, штоба тинь туль мялезонтт тячиень илась, штоба тинь кельголесть Мордовиять, тяряфнеледе самс ширезнок!»
Артём Здунов сюконясь выставкань кочкайхненди: лама ков синь покодсть Россиянь региоттненди, штоба касфтомс эрть содаманц народ ёткса.
Эряви китькстамс, што исторически тяфта лиссь, што мокшэрзянь народсь эряй сембе странать келес, кемонь тежянь представитель эряй Москуса. Эсь народонц кяленц и коензон ванфтомас путнихть оцю путфкс сят землякне, конат дажа эрязь Мордовиять эзда пяк ичкозе мяляфтсазь эсь юрснон, интересовандайхть шачема ширеснон судьбанц мархта. Республикань руководительсь казсь оцю наградат мокшэрзянь народть культурнай наследиянц ванфтоманцты и популяризациянцты путфксонкса историкненди, артисттненди, бизнесонь и Мордовскяй землячествань представительхненди.
Россиянь Сенаторсь, РФ-нь финно-угорскяй народонь Ассоциациянь председательсь Петр Тултаев китькстазе, што эрь Россиянь народтть соньцень лама веконь кувалмонь историяц, эсь лацонь культурац. «Эрь народтть историяц – тя и минь кельгома Россиянеконь историяц. Минь аф фкя лацотама, но минь –фкя оцю и ялгань семья. Россиясь тейнек – марстонь оцю Шачема Мастор! Моледа Мордовияв, тердттядязь – лучше весть няемс, а потом нинге аф весть самс!» - мярьгсь сон.
«Шумбрат» илась поладсь «Из Мордовии с любовью!» творческяй коллективонь и республикань исскуствань деятелень валда и колоритнай гала-концертса
Мордовия Республикань Оцюнять пресс-службац
Фотось: "Мордовиянь кулятнень"