«Минь тинь мархтонт фкя вешфксоньке – республикаса экономикать касфтомац. Тяфта жа социальнай эрявикс тефнень пяшкодемасна – покодемань рынкать одкстоптомац, профессиональнай образованиясь, республикаса ломанень ванфтомась, синь тиф тевсост производительностень касфтомась. Минь покоттяма марса – мон фалу марян ялгаксшинь кемома лафтувонтень предпринимательхнень и бизнеса покодихнень эзда», – мярьгсь Артём Здунов.
Ульсь азф, што ламоц няфтевоматнень коряс 2024 кизось республикасонк пяшотьф цебярь динамикаса. Промышленнай производствань индекссь кассь 7%, продукциянь нолдамась – 20%, зарплатань – 26%, кафксть сяда ламода кассть госкорпорацияс и оцю компанияс пачфтематнень прважамасна.
Бизнесса виияфтомать смузец – инвестициятнень тевс нолдамасна, экономикань и производственнай секторонь оборотонь средстватнень козякофтомасна. Аньцек ётай кизоть республикань предприятиятне топафтсть 30 сяда лама инвестпроектт.
Мордовия Республикань Оцюнясь азсь мяль сянь коряс, што мекольце кизотнень тиф лама од инструментт и вииямань институтт, пшкядемок конатненди компаниятненди максови сатомшка лезкс. Министратнень кабинетснон и фондонь вешфкснень коряс – бизнести максови оцю лезкс. Инь эрявикссь тя тевса – Россиянь субъектова и омба масторова бизнес-миссиятнень сувафтомасна.
Мордовия Республикань Оцюнясь нолдась тевс Правительствань, Профсоюзонь Федерациять и Покодема вастонь максыхнень региононь отделениятнень ёткса республикань колма ширень марсладямась. Тов сувафтф од пялькс «Демографическая и семейная политика, корпоративные программы поддержки рождаемости». Тя масторонь региоттнень ёткса инголи моли практикась.
Лятфтасаськ, тя кизоть Мордовияса кемокстаф шабань шачфтоманкса кирдемань од тев – шабать шачемста максомс эрямс сиводема васта бюджетнай сфераса покодихненди. Мордовия Республикань Оцюнясь мярьгсь, ули пяк пара, кда тя покодемати кярьмодихть бизнес-структуратне, тяфтама няфтемат республикань предприятиятнень эса уже улихть.
Артём Здунов азсь сюкпря региононь фкя командас кочкаф члеттненди марса покодеманкса, общественнай покодемать кандоманкса, конат тисазь инвестиционнай содаф климатть сяда цебярькс и виияфтсазь республикань экономикать.
РСПП-нь Региононь виияфтомань управлениянь управляющай вятись – васенце вице-президентсь Сергей Мытенков мярьгсь, Мордовиянь РСПП-нь отделениясь – Россияса сембе цебярьхнень ётксат фкясь. Сон макссь цебярь питне колма ширде сотф соткснень ёткса. Сей тяфта жа сувафтф пункт боецнень кирьдемаснон коряс, конат служасть СВО-са, мрдасть куду и вешихть покодема вастт. «Сюкпря теенть РСПП-ть руководстванц пяльде. Минь арьсеманьконь коряс Мордовиясь – региононь отделенияса няжедема васта. Сюкпря покодеманкса и масторонь экономикать виияфтоманц инкса», – мярьгсь Сергей Мытенков.
МР-нь СПП-нь региононь отделениянь председательсь Виктор Бирюков поладозе, тячинь аф тёждя пингста покодемань коряс производительностсь – регионца эрямань и сяда тов вииямань коряс оцю тев и няфтема. «Республикань сембе эряйхнень инголе путф оцю тев, штоба арьсефсь, конань минь сявоськ республикать виияфтоманц коряс афоль уле кирьфтаф, а экономикась сяволь вийхть сяда вяри и фалу виияль, – мярьгсь Виктор Бирюков. – Сюкпря Мордовия Республикань Оцюняти федеральнай пяльксса бизнесть коряс ламоц кизефкснень панжемаса и тевс нолдамаса. Кить сяськсы молись – кда минь карматама марса, то сембе тевоньке лисихть парста. Теенк эряви улемс инновационнайкс и тяниень пингонь шарьхкодикс. Карматама молема инголи!»
РСПП-нь Правленияв сувайсь Иван Утенков шарфтсь мяль СВО-нь участникнень и синь семьяснонды покодема вастонь максомань и лездомань кизефкснень коряс бизнесса и государствань марстонь тевтиевомаса. «Россиянь бизнессь ульсь, ули и кармай улема Отечествать инголе службань кандомаса. Минь арьсеф тевоньке – явомс тяса цёратненди пара васедема», – поладозе сон.
Пуромксть пингста спикерхне азондсть Россиянь и Мордовиянь промышленностть виияфтомань фондтнень ширде предприятиятненди лезксонь максомать колга, регионца экономическяй виияфтомать, льготнай режимть колга, конань эса максы Мордовиянь экономикань башка зонась, АПК-са и од ломаттнень ёткса бизнесонь вятема тевсост, корпоративнай спортонь виияфтомать эса, общественнай организациятнень и предпринимательхнень сообществаса марстонь тефнень тиевомаса.
Мордовия Республикань Оцюнять Пресс-службац