9 майста Саранскяйса и республикань райоттнень эса етасть торжественнай мероприятият, конат лемтьфтольхть 1941-1945 кизонь Великай Отечественнай войнаса сяськомста 76 кизонь топодемати. Победань площадьса етась митинг-реквием, коса лятфтамс воиттнень-освободительхнень пуромкшнесь пцтай 7 тежятть ошеряй и столицань инжи. Почетнай васттнень койс коре занязь войнань и трудонь ветераттне, войнань иттне. Траурнай митингть ушедомда инголе мархтост лямбоста корхнесь Мордовиянь Оцюнять аф лама пингс тевонзон тиендисна Артём Здунов.
Мордовия Республикань Оцюнять аф лама пингс тевонзон тиендисна Артём Здунов пшкядсь пуромфненди приветствиянь и поздравлениянь валса: «Кельгома фронтовикт и ветератт! Кельгома офицерхт, военнослужащайхть! Мордовиянь кельгома эряйхть и инжихть! Тячи странаньконь инь главнай илац! Аш тяфтама семья, конанди афоль сав кирдемс войнань пингонь юмафкснень. Тейнек эряви мяляфтомс сянь колга, мезе ульсь. Фашисттненди фкя инь васенце задачакс ульсь явфтомс странаньконь национальнай и религиознай признакс коре. Но фашистскяй пропагандать тя ашезь удала. Тяни минь няйсаськ, кода мировой аренаса тяряфнихть эреклафтомс тя равжа тевть, и тейнек эряви ащемс тянь каршес! Тейнек эряви мяляфтомс, што санганк шуди народть-сяськить вероц! И ся сталмотне, конатнень мархта Мордовиясь васетькшни тячи, няевихть аньцяйнякс сянь ваксса, мезе ульсь войнань кизотнень. Минь обязательна сяськсаськ сембе сталмотнень. Сяськсаськ сятнень, кие тяряфни тапамс Россиять, кие тяряфни срафтомс сонь экономическяй потенциалонц, салси эсь народонц кядьста. Великай Победань шить мархта!»
Артём Здунов отмечазе, што сяськиень поколениясь фалу кармай примеркс россияниттненди – патриотизмаса, трудонь кельгомаса, ломаттненди малаткшнемаса. Войнань кизотнень фронту тусть Мордовиянь 246 тежянь церась и стирсь. Эрь омбоцесь еткстост ашезь мрда. Региононь вятись китькстазе, што мялямсь тя народнай подвигть колга кармай эряма фалу. Мордовияса шачф-касф ломаттне тисть героическяй подвигт сембе фронттнень эса: Брестскяй крепостть, Москуть, Ленинградть, Севастопольть араламаса, Сталинградть ала и Курскяй дугаса тюремста, Украинань и Белоруссиянь модатнень лангса, Европать воляс нолдамста и Берлинть сявомста. Етксост полководецт и рядовойхть, летчикт и танкистт, разведчикт, морякт, партизатт, медсестрат. Сембе синь – армиянь генералть Пуркаевонь эзда сявомок шавф кинооператорти Сущинскяенди молемс – максозь семботь врагть сяськоманкса. Республикань вятись лятфтась марнек странаса содаф Девятаевонь подвигонц колга. «Мордовияса лама геройда. Фкясь синь еткстост – тя Михаил Петрович Девятаев, конанди удалась афкукс «ворьгодемс адста». Тяфтама тев ашель мирса! Сембе пингонь мяляфтома геройхненди», - мярьгсь Артём Алексеевич.
Парадса примасть участия юнармеецне, поисковикне, казакне и кадеттне. Оцюнять аф лама пингс тевонзон тиендисна пшкядсь теест: «1941 кизоня лацонт од ломаттне тушендсть фронту. Синь ульсть синцень планцна, синь мяльсноль пуроптомс семьят, касфтомс шабаснон, касондомс-вииякшнемс профессиональнай ширде. Но тя платтненди ашезь удала пяшкодевомс. Мон азан спасиба сембонди, кие заняф од ломаттнень нравственнай и патриотическяй воспитанияснон мархта. Тя афкукс пяк эрявикс тев».
Од ломаттнень эзда митингонь-реквиемонь участникненди пшкядсь 38№ общеобразовательнай школань тонафнись Данила Шевнин. «Минь семьясонк мяляфтсасзь атянь-бабань подвикнень! Монь алязень атяц ульсь редовойкс пехотаса, казьф «За отвагу» медальса, - азозе од ломанць. – Атянень-бабанень колга мялямть мон карман ванфтомонза фалу. Кельгома ветератт, минь, од поколениясь, спасибатама теенть вельхкссонк ару менеленькса, эряфонкса, сянкса, мес ули тейнек ули кода кельгомс и кеняртькшнемс свободнай странаса».
Сяльде путфтольхть панчфт воиттненди – Мордовияса шачф-касф ломаттненди монументти. Шавфне лятфтафтольхть минута кашт аф молезь ащезь, «День Победы» мороть коряс менели нолдафтольхть гуленят – мирть символоц и российскяй флагонь тюсса воздушнай шархне.
Митингта меле Победань площадьса Саранскяйса етась парадсь. Торжественнай маршса етасть параднай расчеттне.Строевой аськолксса мольсть кадеттне и юнармеецне. А меколи аськолясть парадонь од участникне, конат щафтольхть военнай кизонь щамса.
Мордовия Республикань Оцюнять пресс-службац