Заседаниянь участникненди пшкядсь «Единая Россия» Всероссийскяй политическяй партиять Председателец, РФ-нь Безопасностень Советть Председателенц Заместителец Дмитрий Медведев. Сон поздравляндазень сембонь Конституциянь шить мархта: «Тя пяк оцю ши, сяс мес Основной законць няфнесыне странаньконь фундаментальнай питнишинзон и тиенди юр касоманди-виияманди, кемокснесы обществаньконь марстоньшинц. Партияньконди тя аф марстонь валхт, а самай ся, мезть мархта и мольхтяма Государственнай Думав кочкаматненди», - азозе партиять Председателец.
Дмитрий Медведев китькстазе, што «Единай Россиясь» тяниень пингть – государствать инь оцю политическяй виец: работай сембе вастова, сембе ломаттнень мархта и араласы эсь странанц.
Ульсь китькстаф, што партиясь пцтай шумордазе народнай программать пяшкодеманц, конань мархта сяськсь Госдумав кочкаматнень эса 2021 кизоня. Документть тиемаса, кона ащи пцтай 400 положенияста, примась участия 2,5 миллион россиянин.
Тя кизоть фракциясь сувафтсь Госдумав законодательнай 248 инициатива, абсолютнай ламотне эздост сотфт народнай программать мархта. Примаф 17 закон, конат сотфт спецоперациянь участникнень и синь семьяснон ширеснон кирдеманц мархта.
«Единай Россиясь» сатозе, штоба сай кизонь бюджетса народнай программань мероприятиятнень финансированиясна касфтоволь 174 миллиард цалковайда. Ня ярмакне туйхть школатнень капитальнай ремонтснонды, научнай инфраструктурать одкстоптоманцты, шуроста васьфневи и стака урматнень пчкафтомаснонды, социальнай газификацияти, велеть виияфтоманцты, китнень строямаснонды и, конешна, «Защитники Отечества» фондть ширенц кирдеманцты.
Дмитрий Медведев китькстазе региоттнень эса партийнай командатнень эрявиксшиснон и азсь мяль 2026 кизоть лемдемс «Единай Россиять» местнай отделениянзон кизокс.
Тяфта жа шарфтфоль мяль, што партиясь сяськсь тя кизонь марстонь вайгялень максомань шить видеса – «Единай Россиянь» кандидаттне получасть 80% сембе мандаттнень эзда, синь ётксост спецоперациянь 890 ветеран.
2026 кизоня «Единай Россиясь» сувай векть нилеце пяльксонь эсь юбилеезонза. «Партияти инь главнайсь - граждаттнень довериясна. Ся, што няфнесаськ великай странаньконь Россиять, эряви, штоба максоль кошардома и сяда тов лац-ряц покодеманди. Самай сянкса улихть сембе возможностеньке сатомс сатфкст, сувафтомок сай кизонь политическяй инь оцю результатть – сяськомать Государственнай Думав кочкаматнень эса», - мярьгсь Дмитрий Медведев и спасибась сембонди путксонкса марстонь сатфксненди.
«Единая Россия» партиять тяддень работань сатфксонзон, народнай программать пяшкодеманц, партийнай проекттнень и конкурснень эряфс ётафтомаснон, а стане жа сай пингонди платтнень колга азондсь Партиять Генсоветонц Секретарец, Федерациянь Советть Председателенц васенце заместителец Владимир Якушев.
Тяфта жа заседаниять пингста максфтольхть партийнай билетт «Единая Россия» партиянь од члеттненди.
Артём Здунов китькстазе, што Мордовияса 2021 кизонь кочкамань кампаниять пингста получаф пцтай тёжянь пяле мархта наказ. Ламошкасна сотфтольхть народнай программань мероприятиятнень эряфс ётафтомаснон мархта. Тя инфраструктурань, кинь одкстоптомась, школатнень, медицинскяй учреждениятнень петемасна. Ламошкасна эздост ванфт, а лядыксне сувасть федеральнай и региональнай программатненди.
«Но, улема, фкя инь главнайсь – тя народть ванфтоманц, демографиять коряс кизефкссь. Сяс мес семботи, мезе тиенттяма, эряви лездомс сянди, штоба семьятне келемкшнельхть, улель сяда лама лама идень семьяда. И народнай программась, койсон, тянди видеста лезды», - мярьгсь Мордовиянь Оцюнясь.
Мордовияса примаф мзярошка закон тя ширеса. 1 ноябрьста сявомок нолдаф тевс бюджетнай сферань ся работникненди программа, конат эряйхть и работайхть республикаса. Теест кармайхть макссема эрямс квартират сиводемань договорхнень коряс сяда мельдень рамамань права мархта – квартиратне строявихть ни. Главнай условиясь - шабать шачемац! Тяда башка, валхтф ашушинь вешфкссь питнефтома андомать коряс лама идь мархта семьяста шабатненди школатнень эса. Од пандомат сувафтфт тядятненди, конат 25 кизонь топодемс шачфтыхть шаба, студенческяй и од семьятненди колмоце идть шачемста, стане жа ули решения региональнай материнскяй капиталть эрь кизонь индексациянц и сонь тевс нолямань направлениянзон келепнемаснон, лама идь мархта семьятненди эрямань помещениять инкса и транспортнай налогть пандоманкса льготатнень и ламоть лиять колга.
«Мордовияса лама законодательнай од инициатива. Синь сембе лисендихть народнай программаста, аньцек минь тиеськ синь афкуксонь результаткс», - мярьгсь Артём Здунов.
Мордовия Республикань Оцюнять Пресс-службац