Казани и Иннополису састь 200 мала од ломатть кафта республикатнень эзда – тя Советть Первых первичнай, местнай и региональнай Движениянь отделениянь представителенза. Форумть вяти мялец – межнациональнай мирть кемокстамац и од ломанень поколениять мяльса-арьсемаса патриотизмать кемокстамац.
3-це июньцта форумть покодемаса примась участия Мордовия Республикань Оцюнясь Артём Здунов. Марса Рустам Миннихановонь Татарстан Республикань Раисть мархта сон васедсь Движения Первыхти сувай од цёратнень и стирьхнень мархта. Корхтамась ётась «кизефкс-ответ» форматса – шабатне спикерхненди макссесть кизефкст оцю ломаттнень и шгабатнень ёткса ялгаксшинь соткснень ладямаснон коряс, шабакс пингть, школаса тонафнемать и кизонь каникуласта ваймамать, лама лия мялень салай куля колга.
Корхтамста шабатнень мархта Татарстанста Раиссь и Мордовия Республикань Оцюнясь азозь мяльснон «Зарница 2.0» военно-патриотическяй налхкомать коряс. Артём Здунов шарфтсь мяль сянь лангс, што аф кунара эсь сельмоса няезе тя налхкомать: «Пяк кржа илядсь мала и содаф тя налхкомаса, мезсь ульсь минь шабакс пингстонк. Минь маштоме пяк лац мумс эрявикс ширеть перьфпяле, эсонк тонафтсть покодема командаса и марса молемс эрявикс вешфксти. Тяни жа вешфксне ламода сяда стакат, а тячиень «Зарницась» техническяй пяшкодемань ширде козя – лиякс мярьгомс «космос!»
Рустам Минниханов поладозе корхтамать: «Зарницась» тячи максы эрь участникти оцю вийхть!»
Раис Татарстанста азозе эсь мяленц эряфса тонафтыть и наставникть вастонц колга: «Учительть, наставникть вастоц эряфсонк тячи ламода люпштаф. Монь одкс пингстон тонафтысь ульсь авторитетокс. И тя ульсь виде!»
Артём Здунов поладозе, што эрь ломанть эряфса инь оцю тонафтысь – тя тядятне-алятне, дугаттне и сазорхне. Синь лезкссна и прянь вятемасна тонафтыхть эсон эльбятьксонь аф тиема. «Тяка пингть тонафтыть валоц пяк ванфтома. Мзярда тон одат, семботь мяляфтсак – кодама авторитет ули вакссот тя пингть, стама ломанькс и касат. Мон павазуван, тонафтыне пяк лездсть тейне!»
Поладомок корхтамать сяда тов Мордовияста легкоатлеткась макссь кизефкс эряфса спортть вастонц колга, кода спортсь лезды покодема тевса и кода сяськомс сталмотнень и прябалатнень мархта. Артём Здунов Мордовия Республикань Оцюнясь од цёранятненди и стирьнятнеди азсь мяль: «Эрь прамада меля эряви кочкамс эсь пряце, шарфтомс мяль эсь лангозт и ушедомс работама. Аф стак корхтан, што тренерсь эрявикс ломанць эряфсот – сон пачк няйсы эрь шабанц, фалу лезды мяльса-арьсемаса и няфтьсы эрявикс кить». Республикань Оцюнятне састь фкя мяльсь, что эрь прамать эряви ваномс кода инголи моли куцеманя сяда тов касомста - – лезды арьсемс тиф эльбятькснень и синь петемаснон.
Эсь мяленц Артём Здунов азозе кизефксть лангс, кона сотф общественнай тевтиемать мархта. Ульсь азф театральнай искусствать эрявиксшинц колга, од ломаттнень виияфтомаснон самодеятельностьса и самоуправленияса пряснон няфтемаса: «Эсь пингстонк и миньге примаме участия самодеятельностьса. Теенк школав, институту сашендсть театрань сотрудникне, лездсть теенк марса постановкатнень путомаса. Мон и тянивок путан оцю мяль самодеятельностть кирдеманцты – сон тонафты ломанти аф пелемс няфтемс эсь прянц. маштомс корхтама».
Рустам Минниханов лоткась Движения Первыхть вастонц лангс: «Тя организацияти эрявихть тердемс сембе. Минь вешфксоньке – марса Движениять мархта касфтомс сай пингонь поколениять, мастороньконь кельги патриоттнень».
Васедемань участникне кеподсть кизефкс историческяй событиятнень мекпяльхть шарфтовомаснон лангс. Артём Здунов путозень серцек тя аськолкснень сянь мархта, што тевсь тя канды лама аф цебярь, обжавихть шачфтыеньке, калмави ломанть национальностец. «Тянди ёжень марямась фкя – аф. Историять содамац максы теенк ёжа аф молемс васькафтф куля мельгя – минь аф карматама шарфтома тянь лангс мяль. И эсь пряньконь аф макссаськ обжамс!»
«Ломанць козя содамошиса сембе направлениятнень эса. Искусственнай интеллектсь лезды, но ёжеть аш месть тапамс. Сон эряви касфтомс, козякомс содамошиньконь», - поладозе Рустам Минниханов.
Частта лама региононь вятихне кохнесть форумонь участникнень мархта. Рустам Миннихановонь и Артём Здуновонь ширес ульсь максф нинге аф фкя кизефкс, шабатнень ашель мяльсна явомс спикерхнень мархта – теест ульсь пяк пара содамс синь эряфснон. Эряфонь опытснон.
Форумть покодемань программанц коряс Мордовия Республикань Оцюнясь ульсь Казань ошень 321-це номер идень садса, коса ётай кизоть панчф Движения Первыхть первичнай отделенияц. Шабакс пингть тонафнеманц, семьянь и касфтомань Институтть мархта арьсеф специализированнай тонафнемань процессть коряс программа, лац путф марстонь соткссь Татарстанонь фкя гимназиянь школьникнень и ёмла шабатнень мархта марстонь урокнень ётафтомасна. Тяфта жа Мордовия Республикань Оцюнясь сувсесь Татарстан Республикань Движения Первыхнень Кудозост – тяса ётась региональнай отделениять инь цебярь практиканзон коряс презентация.
Арьсеф, што сай кизоть межрегиональнай детско-молодежнай форумсь «Татарстан - Мордовия» ётафтови мокшэрзянь масторса.
Мордовия Республикань Оцюнять Пресс-службац