Мордовиянь Оцюнясь Артём Здунов 12 августста рабочай поездка мархта сась Атяшевскяй району. Райононь руководительть Константин Николаевонь мархта республикань Оцюнясь ванозень территориять виияфнеманц коряс кизефкснень, инфраструктурань од и петьф объекттнень, а стане жа корхнесь эряйхнень мархта.
Лобаски велеса, атянзон-бабанзон шачема ширесост, Мордовиянь Оцюнясь примась участия Великай Отечественнай войнань воиттненди памятникть ваксса Вечнай толть панжемаса - «Храним Огонь Победы» всеросийскяй акциять мяльса кирдезь, конань ётафнесы эряфс «Газпром межрегионгаз» компаниясь властень региональнай и муниципальнай оргаттнень мархта.
«Тячи пяк башка ши, - китькстазе Мордовиянь Оцюнясь. - Лама атяньке и атянь атяньке тусть фронту, эрь омбоцесь эздост ашезь мрда. Тейнек тя оцю зиян. Тяни тага моли война шачема-касома мастороньконь инкса, цёраньке араласамазь, улихть шавфт. Сяс карматама тя мялямть ванфтомонза - тя пингонь сюре. Монь атязе Лобаскиста тушендсь фронту. Кие-бди мрдась, кие-бди аф, вельф оттольхть - 17 киза теест ульсь. Войнада меле пуроптсть семьят, и шачеме вельдест. Сяс героеньконди пефтома мялям! Пяк эняльдян, штоба тяса фалу улель порядка. Эрьда карматама эряма сятнень инкса, кит шавовсть мирть инкса, сай поколениятнень инкса».
А райцентраса Славань Аллеяса ётась нинге фкя бюстонь панжемань церемония—Социалистическяй Трудонь Геройти И.Ф.Баклановонди.
«Мяляфтома, што фронтсь фалу кирневсь тылса,—мярьгсь панжемста Артём Здунов. - Районцонк Социалистическяй Трудонь 10 Герой и Советскяй Союзонь 11 Герой. Ня бюсттнень эзда ваныхть лангозонк: кода тяни кирдьсаськ фронтть ширенц, кода маласькофнесаськ сяськоманьконь. Тейнек ули кинь лангс ваномс. Эрьда фалу мяляфтсаськ, што саноньконь эзга шуди сяськихнень версна! Фалу гордостень марязь лятфнеса тя аллеять, мзярда сашендан, фалу старандан ваномс. Тяса ламось сотф и семьязень мархта. Атяшевецт, ванфтость ня койхнень-обуцятнень, синь Российскяй Федерацияса инь цебярьхнень ёткста фкятне».
Лятфнемань бюстть панжема Москуста сась Иван Фёдоровичень унокоц—Наталья Шестопалова. Сон азондозе Бакланофнень семьяснон историянц: 1931 кизоня синь панезь Атяшевскяй райононь Сосуновка велеста Казахстану. Социалистическяй Трудонь сай пингонь Геройти эста ульсь 16 киза. Лама сталма савсь кирдемс семьяти. Омбоце родинакс Иван Фёдоровиченди арась Карагандась, коса эрязе сембе эряфонц и коса калмаф. Иван Бакланов ульсь «зрнянь токарькс», шуроста васьфневи специалистокс. 1942 кизоня сонь ётафтозь Пархоменконь лемса Карагандинскяй машинань строямань заводу, коса покодсь токарькс и механическяй и ремонтнай цехонь мастеркс. Кафксть сашендсть теенза войнань кизотнень военкоматста повесткат, но фронту аф аньцек заводонь, но и марнек Карагандань инь цебярь токарть, предприятиянь руководствась ашезе ноля. Войнаньберьф Иван Бакланов лаксезень боевой техникати инь стака детальхнень.
«Сонь ульсь пара седиец, валда пряц и зрнянь кяденза—сембе сонь кельгозь. Заводть директороц, коса покодсь, фалу мархтонза васенцекс кядьта шумбракснесь,—азондсь Наталья Шестопалова. - Сюкпря, што ванфтсасть мялямть тяфтама ломаттнень колга».
Республикань Оцюнять Атяшевскяй району рабочай поездканзон ламошкасна лемтьфтольхть социальнай ширде эрявикс объектонь строямань и петемань кизефксненди.
Мекольдень кизотнень Атяшевскяй районць сядовок мазомсь. Тяса эрьгавста петневихть-мазопневихть общественнай пространстватне, тиендевихть цебярь условият идь мархта семьятненди. Педа-пес петьфт школась, идень садсь, кись. Ули эень арена, бассейна, вииякшни ёмла и средняй бизнес, тиендевихть рабочай вастт.
Мордовиянь Оцюнясь ванозе Челпаново велеса од кить и культурань од кудть - ташта зданиясь палсь ётай тялоть, республикань Оцюнять лезксонц вельде строясть модульнай культурань куд курокста строяви конструкцияста. Велеряйхне спасибасть Артём Здуновонди лезксонкса и эняльдсть нинге вов мезе: фельдшерско-акушерскяй пунктонь башка ащи зданиянь колга. Тя кизефкссь стане жа решандакшневи: строямась ушеткшни сай кизоня.
Од инфраструктурать мархта пара мялезост Атяшева велень эряйхневок - сон ащи райцентрать ваксса, петеманц-мазоптоманц колга тяса аф юкснихть. Тядде «Семья» нацпроектть коряс педа-пес петьф 40 вастонди идень садсь - тядятне-алятнень и шабатнень пяк пара мялезост. «Оцюдонга оцю сюкпря тяфтама мазышинкса,—мярьгсь Ирина Кудосина. - Иденьке кенярдезь сайхть тяза!»
«Инфраструктура для жизни» нацпроектть коряс и «Талина» компаниянь группать лезксонц вельде тиф хоккейнай корт и лама функциянь спортивнай площадка. «Иттне фалу тяса налхкихть, шава аф уленди мзярдовок,—корхтайхть тостонь эряйхне. - Макстама питне, што республикань, райононь руководствась и «Талина» компаниянь группась заботендайхть колганк!»
Тяфта жа тядде Атяшевскяй районца «Молодёжь и дети» нацпроектть коряс педа-пес петьф школась Алово велеса.
Мордовия Республикань Оцюнять Пресс-службац