Артём Здунов ванозе производствать – предприятиясь ноляй светопрозрачнай конструкцият алюминиевай профильста, конат эрявихть кудонь, производственнай помещениянь и общественнай зданиянь остеклениянь пингть. Тя фасадт, вальмат, сувамань и балкононь кенкшт, порталхт, кеподемань-кочкави конструкцият, тялонь садт, клянцеконь перяфкст. Тяда башка, кода азондозе предприятиять генеральнай директороц Александр Тамошин, тонатф стальной профильста конструкциянь нолдамать и обработкать коряс направлениясь .
Предприятиясь покоди аф аньцек республикань застройщикнень и строительнай компаниятнень мархта, но и лия региононь. Кода лятфтазе Атяшевскяй райононь оцюнясь Константин Николаев, райцентраса уендемань бассейнать остекленияц - тив предприятиять специалистонзон кядьснон мархта.
Нинге фкя эрявикс направлениясь - модульнай кудонь нолямась, нят цельхнень лангс ётай кизоть предприятиясь получась республиканскяй промышленностень виензамань Фондтть кирдеманц - 10 млн цалковай. Тя продуктсь сашендови альтернативакс капитальнай строительствати, мезсь лезды емлалгафтомс заказчикть строяманди затратанзон и сяда вишкста строямс объекттнень.
Мордовиянь Оцюнясь корхтась компаниять руководстванц мархта покодемаса перспективнай направлениятнень колга и производствать виензаманц стратегиянц. Корхтамаса примась участия РМ-нь промышленностень, наукань и од технологиянь министрсь Игорь Губайдуллин.