Фестивалень участникта кармай 20 тёжянь ломань, пялесна – од ломатть омба масторста. Мордовиять няфтьсазь 75 од ломань, синь ёткозост сувсихть «Движение Первых» программать активистонза и 25 волонтёр.
20 февральста Мордовиянь Оцюнясь Артём Здунов васьфтсь Од ломанень Всемирнай фестивальса республикань представительхнень мархта Краеведческяй музейса.
Региононь руководительсь лемдезе сай пингонь фестивальть мекольце кизотнень фкя инь эпохальнай событиякс. «Оцю мялезе, штоба тинь усколеде тоста 20-30 афкуксонь, кеме соткста, конат ладявихть эряфоньберьф. Пяк цебярь илась – оцю мялезе примамс эсонза участия! Мялезе кулхцондомс тинь тячи – минь кирьдсаськ тинь сембе инициативантень!» - шумбракстозень участникнень и волонтёрхнень Артём Здунов.
Республикать Оцюняц китькстазе тя фествиальть эрявиксшинц. «Культурное шефство» программать видеса республикась кемокстаф фестивалень участникнень мельге, конат сайхть Боливияса, Сальвадорста и Перуста – синь содафтсазь культурать, историять и Мордовиянь од ломаттнень сатфксснон мархта. Артём Здунов мярьгсь шафтомс од активисттнень мяльснон Китаень и Индиянь инжихнень лангс. Участникне и волонтёрхне явозь эсь мяльснон-арьсемаснон фествиальть коряс Мордовиянь Оцюнять мархта. Жанна Балаевась – добровольчествань волонтёрскяй штабонь региональнай представительсь китькстазе: «Волонтёрствась – ваймонь петема васта! Кенярдян, што улян доброволецокс минь республиканьконь эзда». Н.П. Огарёвонь лемса МГУ-нь юридическяй институтонь гражданскяй правань кафедрань старшай преподавательсь, од тядясь Ксения Кочкурова азозе, што сась Мордовияв шабра регионцта, сяс мес тяса тифт эрявикс условиятне сембе эряйхненди, сядонга пяк од тядятненди и студенттненди: «Тя арась инь цебярь решениякс! Целезе тя фестивальса – азомс сембонди, кода пара эрямс и покодемс Мордовияса». Стане жа сон тяшкстазе, што сяськсь «Законотворец Мордовии» пялькстомаса и лиссь инициатива мархта законтть мяльса кирдезь тиемс «Руспублика Мордовиять» официальнай брендокс. Артём Здунов азозе, што сявсы тя кизефксть эсь мельганза.
Асу шабанди Республиканскяй лицейса тонафнись Егор Петряев лувсы эсь питнишинц тя илать шумордамдонза меле пачфтемс сембе республикасонк эряй шабатненди сянь колга, мезе няихть и кулихть участникне тя фестивальса. Сон азсь мяль тиемс сембе миронь школьникненди эсьлацонь платформа, коса фалу кармай мольфтевома содамошинь и инициативатнень мархта полафтомась. Эсь лятфнеманзон колга од ломанень международнай фестивальса СССР-ть пингста, коса сон примась участия, азондсь Мордовиянь ветеранць Иван Цыганюк. Сон тонафтозень од участникнень: «Корхтада краеньконь, сонь ломанензон колга, кода синь маштыхть лац инжиень васьфтема. Народоньконь козят ваймосна! Корхтада видешить колга и ванфтость Россиять!»
Од ломанень фестивальть шумордасы «Действуй» лем ала региональнай фестивальсь, коса волонтёрхне и участникне, мрдамок Сириусста, арайхть мялень-арсьемань пачфтикс и макссазь тя ванфтомбяльть эсь кизос коре ялгаснонды. Тя илась ётай 14 мартста, Саранскяйсь учи 7 тёжянь инжи. Мордовиянь Оцюнять васедемда меле фестивалень волонтёрхне ванозь «Солдат войны не выбирает. История войн XX-XXI веков» выставкать. Сон панжевсь 20 февральста И.Д. Воронинонь лемса Мокшэрзянь краеведческяй музейса.
Музейть директороц Дмитрий Фролов азозе, што тяддень февральста топоди 120 киза Русско-Японскяй войнать ушетксста – тя событить, рузонь воиттнень доблестьснон колга азондови музейса. Няфтьфт 150-да лама фотография, документ, награда, огнестрельнай и кельме оружиянь афкуксонь образец, солдатонь, офицеронь и генералонь форменнай щапне, снаряжениянь и военнай бытонь паршихне.
Экспозициясь азонды кафта мировой войнатнень, Русско-Японскяйть и Гражданскяйть, Афганистатнонь, Чеченскяй войнатнень и специальнай военнай операциять колга.
Проектть авторонзон арьсемаснон коряс, экспозициясь шарфтсыне од ломаттнень мяльснон патриотическяй воспитаниять лангс. Содафтомок историческяй артефакттнень мархта, синь шарьхкодьсазь, кода ванфтомат государствать мялензон и пяшкодемс эсь воинскяй шумоснон.
Мордовия Республикань Оцюнять пресс-службац