Лятфтасаськ, ётай кизоть сентябрь ковста ётафтфоль Мордовиять бизнес-миссияц Китайса, октябрьста ульсь сёрматф и путф кядь Саранск и Чжэньцзян ошнень ёткса побратимствань коряс марсладямань кагод. Сон фатяй лама аф фкя лацонь направления: экономикань, мишендемать, наукань, культурань, спортонь, шумбрашинь ванфты и образованиять коряс.
«Кенярттяма оду ряд няемс тинь, тяни минь республикасонк, – пшкядсь Артём Здунов Китайста саф коллегатненди. – Тинь республикасонк ётафтоде недяля, и минь араме малакс покодемань тевса марстонь соткснень нолдамаса. Мордовиясь – масторонь инновационнай виияфтомань лидерхнень ёткса фкясь. Минь ламолгофттама НИОКР-нь эса, панжеме федеральнай центра биотехнологиятнень виияфтомаса. Минь университетоньке эрязста покодихть марса. Пяк лац няфтезе эсь прянц «Теплоэнергетика и теплотехника» магистратурань коряс кафта диплопнень тевс нолдамань программасна.
Мордовия Республикань Оцюнясь шарфтсь мяль арьсемс тонафнемань коряс марстонь образовательнай институт (Цзянсунь Наукань и технологиятнень коряс университетть площадкаса) марстонь программатнень тевс нолдамаса. Тя кармайхть кафта дипломонь программат (бакалавриат и магистратура). Республикась яви мяль тонафтомаса, технологияса и гуманитарнай сфераса марстонь тевтиемать келептеманц лангс.
Тяфта жа Артем Здунов шарфтсь мяль сянь лангс, што Мордовиять КНР-ть мархта марстонь соткснень кирдемаснон вельде касы и виияй миньге товарооборотоньке: а мекольце кизоть сон кассь кафксть.
Мордовиса панчф российско-китайскяй ялгаксшинь обществать отделенияц. Мокшэрзянь госуниверситетсь эрязста покоди «Волга – Янцзы» вузонь Ассоциацияса.
Цзянсунь наукань и технологиятнень коряс университетонь ректорось Цзи Чуньянь азсь сюкпря Республикань Оцюняти тонафтомань марстонь университетть тиеманц коряс проектть кирдеманц инкса и азсь кемома марстонь тевть тиевомаса.
Кода мярьгсь Н.П. Огаревонь лемса МГУ-нь ректорсь Дмитрий Глушко, университетсь арьси келептемс Китайста студенттнень поступамаснон. Тяфта жа улихть арьсемат кизонь практикань ётама пингть школаса тонафнихнень полафтома коряс (тя покодемать арьси кирдемс отькорь шабань тонафни республиканскяй лицейсь). «Тя пяк эрявикс тев Саранскяень и Чжэньцзянень побратимонь сюлмотнень виияфтомань коряс лувксть касфтомаса, – мярьгсь сон. – Целайнек минь марстевонь касфтомаса келихть виеньке, кона лезды сатомс и тиемс экономикань од сюлмот».
Мордовия Республикань Оцюнясь, васедемать шумордаманц ланга, шарфтсь мяль, што кармай кирдема мяльсонза сембе азфть марстонь соткснень кирдевомаса. «Минь фалу панжадотама теенть!» - мярьгсь сон.
Мордовия Республикань Оцюнять Пресс-службац