Отец Мелетийсь – Мордовиянь православнай инь оцю обительхнень ёткста фкять наместникоц. Тяда башка, сон ульсь Саранскяень Восточнай округонь церькафненьди благочиннайкс. Мордовскяй и Саранскяень митрополитть Зиновиень благословениянц коряс 2017 кизоста сон арась Саранскяень епархиянь духовникокс. 2022 кизоста – Монастырьхнень и монашествать коряс Коллегиянь Синодальнай отделти сувайсь.
Архимандрит Мелетиень Ардатовскяй и Атяшевскяй епископокс чинонь ётамац ульсь 12 июньста Москуса Спасительть Храмса, сонь ётафтозе Святейшай Патриархсь. Курок ётай архимандритть кядень путомац Ардатовскяй и Атяшевскяй эпископокс ётамати. Мордовиянь Оцюнять мархта васедемаса вановсть кизефксне, сотфне Ардатовскяй приходттнень сяда товолдонь виензамаснон мархта. Тяфта жа корхтамась мольсь идень и од ломанень касфтомаса духовна-нравственнай ширетнень эса программатнень эряфс ётамаснон колга, конат эрязста ётафневихть республикаса православнай духовенствать и государственнай властень оргаттнень мархта.
Справочна: Архимандрит Мелетийсь (Иван Гаврилович Кисняшкин) шачсь 1971 кизоня Краснослободскяй райононь Зайцева велеса. Ельниковскяй райононь Кевонь Брод велеса Покровскяй храмса сонь сувафтозь Ионн Крестительть и Шкаень Предтечеть лемса. Тя храмть мархта сотфт тяниень священнослужительть лама кизоц, тяса сон пяшкотькшнезе алтарникть и лувить послушанияснон. Школада и ДОСААФу анокламада меле Иван Гаврилович служась армияса, военно-транспортнай авиацияса. Демобилизовандась сержантонь званияса. Армияда меле ушетсь пяшкотькшнема иподиакононь послушания Пензенскяй и Кузнецкяй архиепископть Серафимть (Тихоновть). 2000 кизоня Пензань Успенскяй кафедральнай соборса Мордовскяй и Саранскяень епископть Варсонофиень мархта (тяни – Санкт-Петербургскяй и Ладожскяй митрополитсь) путф диаконкс, сяльде - священникокс. Пензаса иерейсь Иоанн Кисняшкин кефкие киза служась Михаило-Архангельскяй храм-часовняса настоятелькс, меле - Богоявления Господнянь храмса. 2009 кизоста 2011 кизос – Кузнецкса Вознесенскяй кафедральнай соборонь настоятель, Кузнецкяй райононь церькавонь благочиннай.
2011 кизоня ётась Саранскяень и Мордовскяй епархиянь скирти, сувафтф Иоанно-Богословскяй алянь монастырть братияс. 2011 кизоня 10 мартста Саранскяень и Мордовскяй митрополитть Варсонофиень кядьса керф шяярец монашестваф Мелетий лем мархта, святитель Мелетийть, Патриарх Антиохийскяйть лемс. 2011 кизонь 27 июльста Священнай Синодть решениянц коряс арась Иоанно-Богословскяй обительти наместникокс. 2012 кизоста – Саранскяень Восточнай округонь церькафнень благочиннайсна. Саранскяень и Мордовскяй митрополитть Зиновиень указонц мархта 2017 кизонь васенце февральста путф епархиянь духовникокс. 2018 кизоста –монастырьхнень и монашествать коряс епархиальнай Комиссиянь председательсь. 2022 кизоста – монастырьхнень и монашествать коряс Коллегиянь Синодальнай отделти сувайсь. Саранскяень духовнай семинариянь тонафты.
Мордовия Республикань Оцюнять пресс-службац