«Бессмертный полк» всероссийскяй акциясь пуроптсь 9 майста Саранскяйса лама участник – 25 тежянь ломанць етасть Мордовиять столицанц ульцянзон эзга радня ломаньцнон, войнань участникнень портретснон мархта. Ашезь ара перяфксокс тянди нльне атямсь и вии пиземсь.
Шествиять ушедомда инголе Саранскяень привокзальнай площадть маласа арти ашель коза прамс: полициянь даннайхнень коряс «Бессмертный полкти» стясть 25 тежянь ломанць, ошень эрь кемгафтувоце эряйсь. Вельхкссост кепсезь сяськихнень фотографияснон – нинге 25 тежянь войнань ветеранць и участниксь лиссть марса идьснон и унокснон мархта национальнай единениянь акцияти. Акцияса участия примась и Мордовиянь Оцюнять тевонзон тиендисна Владимир Волков, кона кандозе алянц портретонц.
Мзярда торазевсь атямсь, а модать лангс прасть пиземонь васенце путерьксне, кивок ашезе када вастонц калоннать эса, зонтикнень ала станяк гордость мархта «уйсть» сяськихнень портретсна.
Победань площадти «Бессмертнай полксь» малаткшнесь духовой оркестрать мораманц и тундань атямть тораманц коряс. Но площадть лангса пиземсь аделавсь. Акциясь шумордавсь минута кашт аф молезь ащезь и «День победы» мороть мархта, конань фатязь шествиянь сембе 25 тежянь участниксь.