Дмитрий Чернышенко: Саранскяйти ули кода тюремс «Futurous – сай пингонь налхкоматнень» примай-ётафты ошень лемть инкса

Дмитрий Чернышенко: Саранскяйти ули кода тюремс «Futurous – сай пингонь налхкоматнень» примай-ётафты ошень лемть инкса

Мордовиянь Оцюнясь Артём Здунов и Россиянь Правительствать Председателенц полафтыец Дмитрий Чернышенко ульсть Универсальнай залса, коса содафтсть тя объектть строяманц шумордаманц мольфтеманц мархта.

Вице-премьерсь азозе: июньцта Россиянь Президентть Владимир Путинонь мярьгоманц мяльса кирдезь нолдаф 850 миллион цалковайда лама цалковай аренать строяманц шумордаманкса, конань строямац ушетфоль нинге 2010 кизоня.

Аренась арьсеф 7,8 тёжянь ломаненди. Тяниень пингть эсонза мольфтевихть отделочнай покодематне и инженернай систематнень ладямасна-нолдамасна. Объектсь анок 90 процентта. Кизоть аделавомс универсальнай спортивнай залть строямац эряви шумордамс.

«Графикть эзда аньцяй лядоматьке аш кода нолдамс. Республикань Оцюняти мярькф сявомс строяманц личнай контроль алу. Строямать аделамда меле кармайхть ётафневома баскетболть, волейболть, хоккейть, ёмла футболть, теннистть, фигурнайста курькснемать и боксть коряс региононь и марнек Россиянь пялькстомат. Тяза арьсекшнихть ётамс художественнай гимнастикать и фигурнайста курькснемать коряс олимпийскяй резервань спортивнай школань 800 воспитанниксь. Комплексти эряви арамс стама вастокс, коса кармайхть касфневома од чемпиотт. Россиянь Президентсь Владимир Путин путсь задача, штоба 2030 кизоти миньцонк фалу занцельхть пря спортса странань эряйхнень 70 процентсна. Юниорхнень ёткса фигурнайста курькснемать коряс Россиянь первенствать арьсекшневи ётафтомс Универсальнай залса 2022 кизонь январьста», - мярьгсь Дмитрий Чернышенко.

Дмитрий Чернышенко и Артём Здунов стане жа корхтасть регионца киберспортть виияфнеманц колга. Тяниень пингть республикаса пуроптф компьютернай спортонь Федерация. Коммерческяй компаниять ширень кирдеманц вельде ётафтф ни аф фкя киберспортивнай турнир.

«Регионца ули сембось киберспортть виияфнеманкса. Сядот од ломанць шарфнихть лангозонза мяль и няфтезь ни пряснон региононь гиберспортивнай турнирса. Саранскяйти ули кода тюремс «Futurous – сай пингонь налхкоматнень» примай-ётафты ошень лемть инкса. Синь ётафтовихть 2023 кизоня. Тянкса вастокс, шять, арай Универсальнай залсь», - китькстазе Дмитрий Чернышенко.

Арьсекшневи, што налхкоматне кармайхть ётнема 3-4 ошса 9 шиста. Эсост пряснон няфтьсазь 1500 спортсменць, пуроми пцтай 300 тёжянь ваны.

Артём Здунов мярьгсь: «Оцю сюкпря странань Президентти, мес кирдезе ширеньконь Универсальнай залть сяда куроконяста панжемаса. Тяса кармайхть ётафневома инь оцю уровенень пялькстомат».