Мордовиянь Оцюнять Артём Здуновонь мархта васедемста Республикань Кудса ванфтольхть региональнай АПК-ть касфтоманц-виияфтоманц коряс кизефксне, тяконь лувксса корхтамась мольфтевсь тундань паксянь тефнень ётафномаснон, аграрийхненди лезксонь максомать, инвестпроекттнень эряфс нолдамаснон колга.
Республиканскяй АПК-са экономическяй няфтематне касыхть. Синь лувкссост, сельхозпроизводствань индекссь Мордовияса 2023 кизоня ламоксть сатозе среднероссийскяйть. Сяда оцю, целайнек странать коряс, сельхозпредприятиянь рентабельностсь. Минсельхозсь, эсь ширденза, максси оцю лезкс производствати и сельскяй территориянь касфтоманцты-виияфтоманцты. Тядде Мордовияти лимитсь сяда оцю ётай кизоннеть коряс- 2,7 млрд цалковай.
Ламоц ярмакне молихть велень территориятнень касфтомаснонды-виияфтомаснонды. Республикаса койкс арась примсемс участия профильнай госпрограммаса. Сонь мероприятиянза мекольце ниле кизотнень пуроптсть пцтай 236 тёжянь ломань. 2024 кизоня Мордовияса арьсекшневи строямс аф кржа объектта.
Аф кунара республикаса ушедсь тундань паксянь тефне. Озимойхнень касфтомасна сатозь площаттнень пялешкаснон, яровой озафтомась ётафтф пцтай 15 тёжянь гектарса. Дмитрий Патрушев шарфтсь мяль производствати эрявикс ресурснень улемаснон эрявиксшиснон лангс. Ётай кизоть пцтай сембе сёронь культуратнень коряс Мордовияса одукс ладяфтольхть рекорднай няфтематне. Минсельхозсь лувсы, што озафтф площаттнень мельге лац ваномста, регионць малады ётай кизонь показательхнень лангс.
Артём Здунов китькстазе: сельскяй хозяйствась – республикань экономикать стратегическяй отрасляц. «Минь агропромышленнай комплексоньке няфти кемокстаф цебярь динамика. Мордовиянь товаронь ноляйхнень оцю путкссна странать продовольственнай безопаснайшинь максомати, синь нолдафснон ули цебярь экспортнай потенциалсна», - тяшкстазе сон.
Велеса покоди Мордовиянь эрь ветеце эряз ломанць. 2023 кизоня валовай сельскяй хозяйствань продукциянь нолямань объёмсь сатсь 119 млрд. цалковай 105,6 % производствань индекс мархта.
Государствать лезксонц вельде, Россиянь Минсельхозть сотксонзон вельде Мордовиясь сувси региоттнень-лидерхнень ёткс эрявикс паршинь нолямаса, кона сатневи фкя эряйть лангс. Республикась марнек трясы прянц эсь продукциясонза и пцтай 60 % тушенды регионцта. Мордовияса – фкя инь уцез потребительскяй арзять питнец.
Республикать сельскяй хозяйстваса эряфс нолдаф 13 оцюдонга-оцю инвестпроект 6 млрд. цалковай инвестициянь общай объём мархта. Ётай кизоть Мордовиянь аграрийхне кочкасть сембе историять пингста рекорднай урожай – 2 млн. 80 тёжянь тонна, а сёроть лувксонц коряс сатозе ПФО-нь региоттнень ёткса васенце вастть.
Приоритеттнень ёткста фкясь – органическяй сельскяй хозяйствась. Республикась заняф тянц мархта Российскяй Федерациянь Президентть Владимир Путинонь мярьгоманц коряс. «Минь сувсетяма сертифицированнай ноляйхнень ТОП-5 региоттнень лувксс. Колма кизоста сувафтоме органическяй производствати пцтай сокаф паксянь7 тёжянь га. «Органикать» касомац-вииямац республикати – тя нинге инструмент ёмла и средняй бизнесонь, фермерскяй хозяйствань, сельскяй туризмань виияфтомаса, велеса заняфшить касфтомаса» - китькстазе Артём Здунов.
Мордовиянь Оцюнясь сюконясь Дмитрий Патрушевонди производственнай проекттненди, а стане жа сельскяй территориянь комплекснай касфтомаса-виияфтомаса программати лезксонь максоманкса. «Минь старандатама касфтомс-виияфтомс опорнай пункттнень, и Россиянь Минсельхозть лездомац тяса пяк эряви, - азозе Мордовиянь руководительсь. – Но и тя оцю ответственность тейнек – ня ярмакнень лангс тейнек эряви эсь пингстонза семботь строямс. И лия программатнень минь шарфтсаськ тянь лангс. Минь ладяфтама покодемать и цебярь динамикать лангс».
Мордовия Республикань Оцюнять пресс-службац