Дмитрий Поздняков рабочай поездка мархта ульсь Лямбирскяй районца

Дмитрий Поздняков рабочай поездка мархта ульсь Лямбирскяй районца

3 февральста Мордовиянь Правительствать Председателец Дмитрий Поздняков рабочай поездка мархта ульсь Лямбирскяй районца.

Оцю Елховка велеса премьер-министрсь ванозе школать капитальнайста петеманц мольфтеманц. Ремонтонь тиеманкса и од оборудованиянь рамаманкса  нолдави 88 миллионда лама цалковай. Сембе работатнень арьсекшневи шумордамс тонафнемань сай кизоть ушедомс. Дмитрий Поздняков макссь поручения виияфтомс ремонтнай работатнень и сувафтомс тевс объектть 1 июльть самс.

Оцю Елховкаса «Комплексное развитие сельских территорий» госпрограммать мяльса кирдезь тиеви капитальнай ремонт культурань кудти. Работатне, конатненди нолдави 77 миллион цалковай, улихть шумордафт тяддеть аделавомс. Премьер-министрсь китькстазе гончарнай мастерскойть работанц эрявиксшинц, кона панчф культурань кудть видеса. Стане жа Правительствать Председателец ульсь «Октябрьская» птицефабрикаса. Предприятияса эряфс ётафтови инвестпроект — мольфтеви 750 тёжянь пря нармоненди комплексть ветеце очереденц строямац, конань питнец 950 миллион цалковай.

Тя шиня Дмитрий Поздняков примась участия Лямбирскяй райононь депутатонь Советть сессиясонза. Муниципалитетонь оцюнясь Юрий Голов пачфтсь меля работань итокнень колга. Районць кизоста кизос няфни сатфкст социальнай и производственнай показательхнень коряс.

Лямбирскяй районць активнайста участвондай нацпроекттнень и госпрограмматнень эряфс ётафнемаснон эса: 2022 кизоня Лямбирьса строяфт водозаборнай узел и ведень аруяфтомань станция, капитальнайста петьф Лямбирскяй райононь 1№ школась, районнай центрань вете ульцятнень эса строяф распределительнай газопровод. Муниципалитетсь примси активнай участия социальнай газификациянь программать эса.

Региональнай Правительствать Председателец спасибась муниципалитетонь оцюняти, райононь активти, депутатонь Советти, предпринимательскяй сообществати лац ладяф работанкса. Тяконь лувксса Велень всероссийскяй Сабантуйть оцю уровеньца ётафтоманкса.

Башка премьер-министрсь отмечазе специальнай военнай операциянь участникненди лездомать коряс райононь оцюнять и эряйхнень оцю работаснон. 

Тядденди задачатнень ёткса азфт дорожнай инфраструктурать виияфнемац, Атемарса водозаборнай узелть ведень аруяфтомань станциять строямаснон.

Лямбирскяй районца арьсеф строямс мусоросортировочнай комплекс.

 «Сембе задачатне, конат эрявихть ётафтомс эряфс минь регионцонк, азфт Госсобранияти Мордовиянь Оцюнять Артём Здуновонь Посланиянц эса. Примаф мероприятиянь план республикань Оцюнять Посланиянц эряфс ётафтоманкса. Тяконь лувксса синь водендафт кадровай потенциалть касфнеманкса, специалисттнень сярьгятькшнеманкса, тя кизефксне оржат Лямбирскяй районти», - китькстазе премьер-министрсь.