«Кельгома конференциянь участникт! Тейнек – примамс тинь минь моданьконь лангса оцю честь, - китькстазе эсь видеообращениянц эса инжихненди регионтть Оцюняц Артём Здунов. – Тя важнай события аф аньцек республикати, но и сембе странати. Тяфтама оцю конференциянь ётафтомась - серьёзнай аськолкс идень стационарнай медицинать касомаса-вииямаса. Теентть ули кода полафтомс инь цебярь практикатнень мархта, корхтамс мекольцень тенденциятнень колга идень здравоохраненияса. Арьсян теентть сатфкст и цебярь взаимодействия».
«Тейнек пяк пара мялезонк, што минь ширьнек, Мордовияса, кармай молема корхтамась инь питнить – Россияса ёмла эряйхнень шумбрашиснон ванфтоманц колга. Минь республикасонк макссеви оцю ванф идень здравоохранениять виензаманц ланг. РФ-нь Минздравть кирдеманц вельде в Саранскяйса ульсь строяф оцю, тяниень пингонь хирургическяй корпус Идень республиканскяй клиническяй больницяса. 2023 кизоня Рузаевкаса ульсь панчф тяниень пингонь идень поликлиника. Кафта тяниень пингонь идень поликлиникат строяфт Саранскяйса. Минь кенярдтяма враченеконь инкса:синь эхянь цебярьхне. Тейнек эряви содамс тинь мнениянтте покодеманеконь колга, тейнек эряви тинь опытонтте», - китькстазе Правительствань Председательть васенце полафтыец Галина Лотванова.
Мордовиянь шумбрашинь ванфтомань министрсь Олег Маркин китькстазе, што Россиянь идень больницянь Ассоциациясь максси тейнек возможность ваномс идень шумбрашинь ванфтомань сферать эса приоритеттнень Россиянь ламоц регионста коллегатнень мархта, а тяфта жа Беларусь Республикаста. Тяфтама конференциятне пяк эрявихть, штоба сявомс лечениянь од методикат, штоба Россиянь иттне получсельхть аньцек инь передовой медецинскяй лезксть.
«Мордовиясь кочкаф конференциянь ётафтомс аф стак. Тяса строяф Россиянь идень инь цебярь больницятнень эзда фкясь. Сон марнек пяшкотьф тяниень пингонь оборудованияса, строяф пяк цебярь логистикась. А нинге тя больницясь – од специалистонь, студентонь-медиконь анокламанди база. Регионсь сатсь серьезнай результатт атнай шабань куломаса», - китькстазе РФ-нь идень больницянь Ассоциациять правлениянц председателец профессорсь Николай Ваганов.
Инголе медикнень нинге фкя шисна сотрудничестванди. Планца – идень шумбрашинь ванфтомань сфераса профилактикань кизефкснень ваномасна, а тяфта жа республиканскяй идень больницяв молемась.