«Тя кудса эрятама 15 кизода лама ни. Сембось тушенды мялезонк - вастсь цебярь, пирьфсь пара, эряйхне ладяйхть. Тядде одкстоптозь асфальтть и петезь-мазоптозь площадкать. Арась пяк пара - иттненди ули коса налхксемс, занцемс пря спортса!» - азозе Мордовиянь Оцюняти семьясь, кона эряй Поповонь ульцяса 71№ кудса.
Территориясь, кона кружаф вете этажса куттнень мархта, афкукс няевиста полафтсь цебярь шири! Тяса эвондасть волейбольнай площадка, иднятненди од карусельхть, спортивнай тренажёрхт, конешна, мялень салай скомнят. Полафтксненди кеняртькшнихть и шабатне, и оцюфне, и сиянь кизонь ломаттне. Сембе тя полафтксненди нолдафоль пцтай 4,5 цалковай. Поповонь ульцяса 71№ кудсь арась Ленинскяй райононь пцтай 40 куттнень эзда фкакс -сон одкстоптф куттнень ёткса, мезсь пяк тусь мяльс.
11 августста илять пирьфсь пяшксель идень кайги вайгяльда, морода и седи ваксстонь пеедемада–сей сась куд пирьфонь территориянь республиканскяй фестивальсь «А минь пирьфсонк!». Мезе тяса аньцек ашель–артисттне кеняртьфнезь эряйхнень мороса, волейбольнай площадкань ару шуварть лангса мольсь спортивнай мастер-класс, цёранятнень матса тонафнезь «тюремань» приёмтненди, ёмлатне курькснесть од нюрямса и карусельса. Сятненди, кие кельгсы ётафнемс пингть польза мархта–мастер-класст СВО-нь ветеранонь Ассоциациянь, Отечествань воинонь семьянь Комитетонь, од ломанень движениянь представительхнень эзда - декоративно-прикладной творчествать и оригамить коряс. Тяса и логикать и смекамать лангс налхксемат, конатнень ёткса «Мафиять» мокшэрзянь аналогоц - «Бандюгайть» налхксемац.
«Ашине сода, што тяфтама налхксема ули! Тяни ялганьконь мархта карматама налхксема–пяк мялень салай!» - мярьгсь ёмла Данилась.
Пирьфонь иласа цебярть эзда - «Тонкая материя» проектть вастоц, кона водендаф од ломаттнень репродуктивнай шумбрашиснон ванфтоманцты. Специалисттне азонкшнезь стирьхненди и цёратненди, мес эряви ваномс шумбрашицень мельге и коза эряви пшкятькшнемс диспансеризациять ётаманкса. Шумбра од ломаттне–шумбра семьятне - шумбра иттне!
Республикань Оцюнясь Артём Здунов васетькшнесь и корхнесь тястонь эряйхнень мархта. Аф аньцек кенярдсть марса ётафтф работаснонды, но и корхтасть пирьфть и МКД-ть виияфнемаснон коряс сяда товолдонь планть колга.
Энгельсонь ульцяса 22№ кудонь эряйхне спасибасть полафтксонкса и азозь, што цебярь полафткст кудса учихть потмоширде. Регионть руководителец варжакстсь подъезду. Азозе, што аф сатни тонатф урядамась. Кизефтезе, мзярда мекольцеда ётафтовсь ремонт. Нинге 2009 кизоня подъезттнень косметическяйста одкстоптозь вельхксть петемдонза меле, меле полафтозь вальмятнень пластиковайса.
«Эряви сяда сиденяста тиендемс генеральнай урядама, а меле арушинь кирди, эста эстокиге ули лиякс няевома. Тоса, коса ару, и тарксеви ваймось сяда тёждя, и эрямс сяда пара», - пшкядсь Артём Здунов управляющай компаниять руководстванцты и райононь оцюняти. Сон стане жа шарфтсь мяль подъездса проводкать содержаниянц лангс–кода повсь тя тевсь тяза уле.
Мордовия Республикань Оцюнять Пресс-службац