«Темась пяк эрявикс и ламафакторнай – ушедомок китнень кирдемаснон, синь петемаснон, нарушениятнень тяштемаснон эзда, молемок водительхнень шумбрасиснонды и синь ванфснонды ки лангса движениять правиланзон лангс», - китькстазе регионть руководителец.
Артём Здунов китькстазе, што республикаса фалу ётафневи няеви профилактическяй покодема. Тя образовательнай учрежденияса идень дорожно-транспортнай травматизмада ванфтомати мероприятият – синь эздост ётафтф 6 тёжяньда лама, и СМИ-са социальнай рекламань няфтемась, лама ломань мархта васттнень эса, китьнень лангса. Конешна жа, аварийность валхтоманц лангс покоди фотовидеофиксациянь комплексть покодемац. Сембе ня мератне макссесазь эсь пара результатснон – аньцек тя кизонь ниле ковста удалась валхтомс ДТП-нь лувксть пцтай 20% лангс ваномок этай кизоть лангс.
РМ коряс МВД-нь Госавтоинспекциянь Управлениять начальникть врио-ц Дмитрий Лысов пачфтезе, што 2023 кизоть итогонзон коряс ДТП-нь лувкс валгсь 17 %, раненаень лувкссь –23 %, марнек моли федеральнай значениянь трассатнень лангса аварийностень сембе показательхнень коряс валгомась. Тяка пингть республикать кинзон лангса киза потмоста шавовсть 118 ломань, и пяледа лама куломась сашендови федеральнай и региональнай значениянь китнень лангс. Сянкса Госавтоинспекциянь сотрудникне касфтозь ДПС-нь нарядонь лувксть стака и аварийнай участкатнень лангса. Тяда башка, 20 единица лангс касфтф ДПС-нь сотрудниконь штатсь республикань райоттнень эса.
Сяда сидеста ДТП-нь причинакс арси скоростной режимонь аф ваномась, каршек моли движениянь полосав лисемась, а эрь нилеце ДТП-сь –тя пешеходтнень лангс наездсь. Эряви азомс, што марнек пешеходтнень лангс наездонь лувкссь валгсь четвертьта ламос. Ульсь китькстаф, што ламоц пешеходтнень щамснон эса ашельхть светоотражающай элементт.
Тя темати ульсь максф оцю ванф. Мордовиянь Оцюнясь макссь поручения сембе заседаниянь участникненди арьсемс мероприятият конат пяшкотьсазь педа-пес тя прябалать, максыхть «светоотражательхть» республикань эряень сембе категоритненди – иттненди, од и сире ломаттненди ломаттненди, - и даже индивидуальнай мобильностень средстватненди. Аф стака правилась щамса светоотражающяй элементонь улемась лезды ванфтомс эряфть.
Оцю путфкс аварийностень валхтомати, специалисттнень мненияснон коряс, сувафнихть фотовидеофиксациянь нарушениянь комплексне. Тяни Мордовияса покоди 244 стационарнай и мобильнай комплекст. Тя кизоть синь лувкссна касы 10 лангс. Аньцек тя кизоть ванф 240 тежяньда лама материал нарушениятнень колга: ваномок тяка пингть ётай кизоть мархта 37 % кассь постановлениянь лувкссь и пцтай 30 % - панф штрафонь лувкссь.
Совещанияь пингста корхтамась мольсь и сянь колга, што сидеста ДТП-нь туфталкс арси и аф цебярь кинь-ульцянь сетть состоянияц – тя пцтай эрь колмоце происшествиясь. Движениясь эрь кизоня касы, а кинь инфраструктурась – сонь нолдамань способностец и движениянь ритмти тонадомац – лядондыхть апак полафтт.
Республикаса УДС-ть нормативнай состоянияти сафтоманц коряс мератне ётафневихть фалу – тя токсесы кинь полотнань петемать и разметкань тиемать, знакнень и пешеходонь ётаматнень мельге ваномась, светофорохнень покодемань режимсна и ульцянь освещениясь.
Башка ванф республикань Оцюнясь шафтсь федеральнай трассань участкань содержаниять лангс. Тя кизоть путф планц тяфтама кинь 50 вайгяльбе кувалма петема, сяда тов мольфтеви Инсар ляйть вельфке седть лангса петемась Саранск ошень объездть лангса и Татаронь лоткть «Саранск – Сурское – Ульяновск» федеральнай трассань участкать лангса – покодематне тяса арьсевихть шумордамс кизонда-сексенда.
Артём Здунов китькстазе: эряви сяда куроконя тиемс тят тефне.
Ульцянь-кинь сетть лангса ётафневи покодематнень колга Саранск ошень округса, ульцянь валдоптомань одкстопфтомать и кинь движениянь проектть эрявиксшинц колга азондсь Мордовиянь мэрсь Игорь Асабин. Сон тяфта жа мярьгсь, што лотконь петемась ошень китнень лангса пяшкотьф 90 % лангс.
РМ-нь образованиянь министрсь Елена Солдатова корхтась профилактическяй покодемать колга, конац ётафневи кинь движениять пингста сетьмешинь темать коряс республикань образовательнай системаса аф аньцек иттнень мархта, но и синь тядяснон-аляснон. Сон китькстазе, што учеви кизонь пчкафты кампанияса тя ширети кармай лемтьф башка модульсь – ваймяй идень охватсь кармай 100%. Тяфта жа ведомствась арьси ётафнемс тядянь-алянь собраният регионтть промышленнай предприятиянзон эзга.
Мордовия Республикань Оцюнять пресс-службац