Праздниконь шить карша республикань медикненди мяль-вал мархта пшкядсь Мордовия Республикань Оцюнясь Артём Здунов. Сон азсь сюкпря покодеманкса, профессионализмать и эсь вийнь путомать эса врачненди, санитархненди, месестратненди, медбраттненди, медицинань лезксонь курокста максы службань покодихненди, провизорхненди, фармацефттненди, медработникненди, конат топафтыхть эсь долгснон эса од территоияса и СВО-са, сяттненди, кие аноклай од специалистт.
Республикань Оцюнясь мярьгсь, што тячи шумбрашинь ванфтома тевса покодихть 16 тёжяньда сяда лама ломань. Аф кунара вице-премьерсь Татьяна Голикова макссь Мордовия Республикань Оцюняти РФ-нь Правительствань Председательть благодарностенц – республикаса мекольце кизотнень удалась цебярьгофтомс демографиянь няфтьфксть. Ётай кизоть республикаса кирьфтаф аньцек шачи шабатнень ёткса куломась валхтфоль историческяй минимумть видес тя сембода цебярь няфтемась Россиянь сембе региоттнень ёткса. Кирьсь марнек эряйхнень ёткса куломась, кувалгодсь эрямась.
«Тяни оцю вешфкссь – покодемс шачфтомать касоманц лангса. А тя васендакиге обществаса шарьхкодемань культурась, тя од ломаттнень мархта покодемась – синь улест шумбрат, эрявихть минь семьяса кеме, фалу сембе пингонь питнишитне. Тя вешфксть сатомаса заняфт пцтай сембе», шарфтсь мяль Артём Здунов.
Региононь руководительсь азсь сюкпря масторонь Президентти шумбрашинь ванфтома отрасльть кирдеманц инкса. Мордовияса работай тяниень пингонь вешфкснень коряс онкологиянь поликлиника, ушетф онкодиспансеронь строямась. Сембоц вете кизоньберьф поликлиникатнень и больницятнень строямс и петемс ульсь явф 17 миллиард малава цалковай. Од направлениятнень ёткса, конат ушетфт федеральнай центрать мархта, тя шумбраста кувака эряфонь ванфтозь центратнень панжемасна – тяфтама тиеви и Мородовияса.
Артём Здунов шарфтсь мяль сай пигста арай тядятнень мархта медикнень покодема тевснон эрявиксшиснон лангс. Эрь кизоня 40% малава аватне кулхцондомок и сатомок правовой, психологическяй и медико-социальнай лезксонь получамда меля сайхть мяль ванфтомс апак шачт шабать. Ёфси курок улихть тифт ниле од стирень-авань консультацият медицинскяй лезксонь максомс велеса, тя пингть технологическяй оборудования путови республикань перинатальнай центрав. Башка мяль тяни явови од ломаттнень репродуктивнай шумбрашиснон ванфтомаса шабакс пингста сявомок.
Сюконяма валхт республикань руководительсь азсь медикненди, конат службань долгонь максозь арнихть Херсонскяй областень Каланчакскяй округонь эряйхненди медицинань лезксонь максома. Од территорияса покодихть ни Мордовияста саф 18 бригада.
«Врачненди минь верондатама – обществаса ули акша халатса ломанть эзда лезксонь учезь культурать кандоманц, – мярьгсь республикань Оцюнясь. – Ломаттнень шумбрашисна – кеме стратегическяй ресурс. Тя республиканьконь козяшиц. Сюкпря Шкайти, минь улихть ломаненьке, конат лац тонафтфт, конат маштыхть тя ресурсть лац вятема, ванфтомонза и маштыхть шумбрашинь казема. Ломаттнень эряфса сембода стака пингста лездыхть улемс павазукс».
Региононь руководительсь макссь оцю казнят медицинаса покоди работникненди. Отрасльса покоди ветераттнендт руководительть эзда ульсть казьфт панчфт.
С.В. Катковонь лемса республиканскяй клиническяй больницянь медицинань реабилитациянь отделениянь врачти-неврологти Наталья Ершкованди максф «Заслуженный врач Республики Мордовия» почетнай лемсь, сон лемдезе награданц эсь шачфтыензонды. «Профессияти мялень путомасна и тевонь кельгомасна лездсть тейне кочкамс эсь эряфонь кизень. Сембода оцю кенярдемась тевсон – няемс, кода стяй пильге лангс монь пациентозе. Эряфонь мялезе – мзярда-бди алязень, МАССР-нь заслуженнай врачть, Геннадий Александрович Старостинонь, азф валонза: «Кодама паваз стяфтомс пильге лангс ломанть!»
Мордовиянь Госсобраниянь Председательсь Владимир Чибиркин корхтась, Медицинань покодема шись – тя башка ила: «Минь шарфттама мяль отрасльса цебярьста тевснон тии ломаттнень лангс, конат аралайхть ломанть эряфонц эса. Тинь эсь асушинтень мархта аралата и канттада ломаттненди и седишкава крхка мяль, максомс кемома эсь пациенттненди. Тянкса теенть башка сюкпря».
«Ломаттне теенть сайхть эсь сембода питни козяшиснон мархта – эсь и мала ломаньцнон шумбрашиснон петема. Сюкпря теенть профессиянтень кельгоманкса и ваймонтень козяшинц инкса!» – пшкядсь коллеганзонды МР-нь шумбрашинь ванфтомаса министрась Олег Маркин. Сон поладозе, шумбрашинь ванфтома отраслясь марясы региононь Оцюнять Артём Здуновонь фалу лезксонь и мялень анок максоманц.
Медикненди Мордовиянь артисттне казсть мялень салай концерт.
Мордовия Республикань Оцюнять Пресс-службац