Тячиень фестивальти сафт авторхт, идейнай мялень кандыхть, музыкантт, поэтт, специальнай военнай операциянь участникт и общественнай деятельхть. Фестивалень оцюнясь, лама идень тядясь режиссерсь-документалистсь, поэтсь Олеся Шигина шарфтсь мяль, што кунара тусь мялезонза Мордовиясь, сяс мес тяса ули рузонь культурать виияфтомац, Шкайти валонь кандомась и Российскяй государствать и сонь воинонзонды кирдемась.
«Тячи сей кочкавсть арьсемань коряс аф фкя лацонь ломатть, но минь сембе марса – марстонь фкя пляма. Теенк эряви сяськомс! Аньцек марса пуроптозь, кода фкя мокшенда лаца, минь сяськсаськ тя кяжть, кона врьгятсь лангозонок: кулятнень пачфтема кужеса синь тюрихть видешить мархта, историять ширде – ёрайхть тапамс минь коеньконь-обуцяньконь, промышленностень ширде – яжайхть науканьконь эса, эсь прянь кемоманьконь, – мярьгсь Олеся Шигина. - Кинось сотсыне марс искусствань сембе сатфксоньконь – сон сембе оружиятнень ёткста инь виись . Кда минь сяськтяма тылса, то сяськтяма и фронтса».
Мордовия Респбликань Оцюнясь Артём Здунов азсь сюкпря «Кино на службе Отечеству» фестивальть сембе команданцты: «Омбоцеда республикасонк ётафтови тя фестивальсь , теенк тя оцю честь и мялень кирдевома. Сяда пяк питни ся, што сон ётафтови Сяськома Шить 80 топодемань юбилейть мархта! Эсонк тонафтсть, историять сермадсазь сяськихне, но педа-пес апак тапак врагсь, кона сонць ёрай сёрмадомс эсь антилетописенц, ёрай васькафтомс историять. 50-100 киза ётазь сембось кармай няжедема сянь лангс, мезе минь каттама мельганк, сяс «Кино на службе Отечеству» проектть покодемац пяк эряви! Сюкпря теенть сонь инксонза! Минь марса вояватама идеологическяй фронтса!»
«Кино на службе Отечеству» фестивальть ётафтовома пингстонза сувафтфт эзонза лама направления: музыкать, поэзиять, изобразительнай искусствать, режиссурать. Фестивалень командать учаастникоц Рома Жиган азсь сюконяма валхт региональнай пяльксть сембе аноклаензонды: «Мордовияса маряви кельгома!» Морайсь казезе сембонди «Мирное небо над землей» мороть. Церемониять пингста ульсь няфтьф «Из ЗК в ЧВК» киноть тизероц – кунара тюрьмав пякстафнень колга, конат стясть Отечествать аралама.
Россиянь Общественнай палатав сувайсь, суверенитетонь, патриотическяй проекттнень и ветераттнень кирдемань кизефкснень коряс комиссиянь председательсь Владимир Рогов мярьгсь: «СВО-нь васенце шиста сявозь, хуш мон аф военнаян, минь аралай армияньконь мархта мон ссувань Запорожскяй шачема модать лангс. Минь рузонь народсь – фалу улеме и ащетяма видешиить инкса. Мзярс минь марсотама – минь аф сяськофтама киндиге. Мордовияса ёфси бта лия модась, ломаттневок лият – тинь сембось моли видекс! Сюкпря теенть седишкава путф кельгомать инкса».
Владимир Рогов казсь общественнай медальхть «Шагнувшие в бессмертие» Вера Петровнанди шавф боецть Илья Дьяковонь тядянцты и шавф боецть Виктор Любаевонь семьянцты – Надежда рьванцтыи Иван цёраснонды.
«Отцы России» региононь отделениянь председателец Максим Захаров казсь «Отец солдата» общественнай тяшкстамонь казня Александр Афониненди лама идеень аляти – кафта церанза няфтсть отвага и аф пелемаши специальнай военнай операциянь тефнень топафтовомань пингста и поладыхть служамаснон Отечестваснонды. «Отец солдата» казнясь тяфта жа максф Александр Швецовонди и Евгений Рыжаковонди, синь цёрасна тянивок СВО-сот.
Фестивалень командась усксь Мордовияв кой-мзяра документальнай лента специальнай военнай операциянь геройхнень колга, простой ломаттнень, конат няйсазь эсь путф тевснон Шачема масторть ванфтомаса, видешить кяподеманц эса и историческяй мялямть кемокстамаса-ванфтомаса. Сембе ускф кинотне лядыхть республикаса няфтевоманди и аф аньцек школава. Тяда башка, фестивальть вешфксонзон коряс Мордовияса ётафтовихть нинге снимандамат и тиевихть колма кинолентат.
Мордовия Республикань Оцюнять Пресс-службац