Мзярда ушедсь войнась войнась Михаил Семеновиченди ульсь 14 киза. Фронтовиксь лятфни, што тя пингс мяляфтовихть войнань сталмотне и нужась. Сон ялганзон мархта покодемда меля мольсть колхозонь паксява куду, мзярда кие-бди пяшкодезевсь: «Война!». Семьястонза, кона эрясь Атяшевскяй райононь Киржеманы велеса, войнав тусть колма ломатть. Алянц сявозь 1942 кизоня, сон шавовсь Калуга ошть ала, коса кирдсть врагть эса, штоба аф нолдамс Москуву. Сазороц тяфта жа тусь войнав 1942 кизоня. Сонцень Михаил Семёновичень сявозь 1944-це кизоня ноябрьста. Тонафнема частьта меля сон повсь сюлмомань войскав. Аралась Польшать, Румыниять и Австриять эса.
Ветеранць, сяськомать васьфтезе Венгриянь Дебрецен ошса, коса ванць Венгрияса Советскяй Правительствань генеральнай секретарть мархта связть сюлмоманц. Казьф Отечественнай войнань 2-це степенень Орденца и «За победу над Германией» медальса. Великай Отечественнай войнань участникть кудса повфтаф карта, коса няфтьфт Европань ошне, конатнень эса сон аралась. Шачема куду мрдась 1951 кизоня майста и сембе эряфонь виенц покодсь колхозса.
Ветеранць Республикань Оцюнять васьфтезе мала ломанензон мархта. Михаил Семенович рьванц мархта касфтсть ниле шабат, т яни сонь сисем уноконза и колма правнуконза. Семьясь пуромсь штоба азомс пара вал-мяльхть Сяськома Шить юбилейнай иланц мархта эсь аляснон и атяснон эса!
Чаень симомста сембе пуромфне кулхцондсть Михаил Семеновичень лятфнеманзон войнань стака кизотнень колга. Мала ломаненза азозь эсь мяльснон-арьсемаснон «На Безымянной высоте» героико-патриотическяй спектакльть ваномда меля, кона ульсь няфтьф шида тяда инголе «Огарев Арена» стадионца.
Мордовия Республикань Оцюнять мархта марса ванозь видеопоздравлениятнень, конат кучфт телеведущайть Андрей Малаховонь эзда, минь земляконьконь, «Садко» группань солистть Александр Бардинонь и Михаил Семеновичень уноконц Глеб Суняйкинонь эзда, кона тяни ётай армияса срочнай служба.
Артём Здунов азсь сюконямань пара вал-мяльхть Великай Отечественнай войнань участникти и арьсесь теенза кеме шумбраши и эряфонь кувака ки. «Сюкпря атяньконди Сяськоманкса!» - мярьгсь Республикань Оцюнясь Артём Здунов
Мордовия Республикань Оцюнять Пресс-службац